Svrabín Koqkvm Francisò “The Letter” Kà vgo í Laudato Si svng mvtushì we shøptan Hang vngvt tiqlòng Yangon taq dvtanshì we
Svrabín Koqkvm Francisò “The Letter” Kà vgo í Laudato Si svng mvtushì we shøptan Hang vngvt tiqlòng Yangon taq dvtanshì we
The Letter”Kà vgo í Laudato Si svng mvtushì we shøptan Hang vngvt tiqlòng Yangon Ganda yāzinta taqø go vring bø’à we vsvngrì kaq May 26 ni Vsháng 9:30am kèní vyá:ng rvwe høq dvtanshì bø’ì.
Vkangpè vdòng taq mà-vl bø’ì we Svrabín Koqkvm Francis (May 24 ni 2015)nøng la taqø dvtan bø’à we v-ní baq wà baq “Nøngmaq tiqdø v-li we Mònggvn svng roqgār we ” Laudato Si Karu bok (10)nøng nøngø’m gø ínø, (May 24 ni kèní 31)ni høq Laudato Si nár ku mvsat bø’à we íe. Yalòng tvyø svng Yangon KMSS mvdò nvng Catholic Svrado rúng me CBCM kèní dvnúng shì nø wáshì bø’ì.
Wè lìpong kaq, Catholic shvngømré Yangon Svrado shvnvp gvba rì, Hkristan kongsi mvdò kèní Svrado Svra gvba rì, Mvkun langli gønpaq lúnò rì, Mvkun tvløt we taq daì rì, Catholic Svrado angké mvdo CBCM vdòng vl RVA, OSC,Youth commission, CRCM, KMSS mvdò rì nvng vpø’nøntní gōshì we vnvmchvng shvngømré rvzvngcerì mvmè kømngøm bø’ì.
Svrabín Koqkvmò kønmvng Cardinal Charles Bo lúm mvlúnò rvt ang tvle Svrado Shvnvp Noel Saw Naw Aye kèní vtō Kà shø’n we taq Laudato Si svng mvtushì we ” yalòng shøptan Hang vngvt nímzi lòng nø Móng wál(5) lòng svng mvtu nø dvtanshì lòng íe.
Vsvng pvn shvngbe móngdàn dvrit vgám rvweng lvm mà-vl Mònggvn Dø’ngtáng nø tiqdø vl lúnshì lvm rvt wá v-du dang, Vjúrøt lòng nvng chaqdvp dvnúng shì lòng nø tiqdø vzàm dang íwe nvng Bóy shvbø’n dvnúng shú rì kaq svng gø oqā wà Kà dvman nø shø’n bø’ì.
KMSS program manager Vshaqmè Mary Kin taqkèní gø Myanmar móng dvshá zā bvnlìrì nø Svrabín Koqkvm Leo (14)ò dvtú we Mongzøl lòng, Rvpra we dvrá nvng Dìngman dvrá mvdvmø mvtu nø Rvtø lvngcha rì vbóng vtuk lvm, dvshá vsvngrì lvpat yv’nggúng vl lúnshì lvm, shøngtøng rì vrá kvt dvzaqshì lvm, dvshá zā lòng nvng shóngnønt Dvrá rì svng mvtu nø dvnúng lvm dang, Jubilee nøng taqø shvrv’n vdòng vløp rì lutshì lúnlvm dvnúngà lvm vl dang gø shø’n bø’à.
Zaywa, Mvn, Mvkun dvløt rì kèní shvngør shvbyō nø, gønpaq lúnò rì, mvdøng zaqle rì kaq svng gø gønpaq rì zí nø shvring shì bø’ì. Lvmvng tvyø svng Fr. Dominic Zabinus nvng Yangon KMSS Director kèní oqā wā taqsórí lvngdøm dvdømshì bø’ì.
