St. Rita of Cascia
St. Rita ò àngpè ní àngmè nø Abani shìgùng taqø rvmá tvmø wavm we vsvng íyv̀:ngì. St. Rita nø Yesu Kristuò dvshà mvhøt we tvrà nvng téwa “Vdè nvng tvpní shì vsvng rì kaq vdè tiqgóng ku shóngshì ràwe tvrà” wawe dvtú kà svng cv́n dvgøm dvzaq shì yv̀ngì we tiqgǿ gø íe.
St. Rita vsvk lvpat vrvm ráì we rvtø̀ taq àngò Gvray kaq vjúrøt shìwe kà shaq rì svng Gvrayí táaò nø̀ St. Rita vsvk (18) nøng gøm bǿì wekvt St. Augustine Convent svng gòng lv́m shvrúng nøt zángshì ráì. Àngnø Cascia taq vlwe St. Augustine Convent svng gòng lv́m shvrúng nøt vlwe ínìgø àngpè ní àngmè taqkèní døngku shvzøng shìlv́m tvrà svng wa dvtú òe. Wervt àngpè ní àngmè kà svng cv́n dvgøm weku Gvray àng nøt wa laqí wanø̀ Paul Fadina nvng døngku shvzøng shì yv̀ngì we íe.
St. Ritaò døngku pè taqkèní gø St. Rita àng Gvray kaq kámnøt laqyà rì svng pà ti mvlvn we wáshìe. Døngkupè taqkèní vrù ra pàn vmaq nø mvnyamvm we nvng dvki vrè wa wáshìe. St. Rita nø àngcè lvngà shvdang (2) gø shvzaq bǿà we høqshaq noqngø̀m tvrà taq dvzaq shìyv̀ngì. St. Rita àngnø v́maq vnvt shìwe, za vsvngrì, dvshà vsvngrì kaq tubúm dvbangā we bv̀nlì taq nøt løm nø dvzaq shìe.
Kadv́ngte màléwe rvtø̀ taq St. Rita àngò vjúrøt dvzaqshì we tvrà taqkèní àngò døngkupè gø St. Rita àngò laqyà, kámnøt tvrà rì svng vtoā ò nø nøt vwángshì ráì. Tiqni rvtø̀ taq St. Rita àngò døngkupè svng vsvng 2 gøí shvtnò nø lvpat shì bǿì wehøqshaq St. Rita àng taqkèní àng døngkupè ò pvlacè dvpvt vjúrøtāò we mvtaq vsvng shvt gǿ ní svng gø mvrà vroqā yv̀ngà we íe.
We rvtø̀ taqnø St. Rita àng vsvk 30 nø íyv̀:ngì. Àngnø St. Augustine Convent svng góng lúnlv́m dvpvt 2 boq høqshaq dvkáng shìyv̀ngì we ínìgø gònglv́m vkáng mvlún yv̀ngò we íe. Tiqni rvtø taq St. Rita nø Convent svng dinø̀ noqngø̀m tø̀ngnø vdòng taq vjúrøt shìda we svng yv̀:ngòe. Ínìgø noqngø̀m tø̀ngnø nø coqcì gvraq shaq vdòngø gòngnø̀ vjúrøt shì we svng vsvng rìí yv̀ngò nø vsvngri dà á:mì. We shvrà taqø St. Rita nø (25) nǿng døp Gvray bv̀nlì ri nø dvzaq shì yv̀ngì.
AD 1442 nǿng taq St. Rita tiqgø Yesu Kristu ò dvshà mvhøt vhǿm yv̀ngà we tvrà svng cv́n dvgøm lv́m pv́ngshì yv̀:ngì. Chø̀m tø̀ngnø døngtv́m taqø vcaq we hang cø̀mla kèní St. Rita svng gálòng nvmik gømla dvtan we gø bø̀n gung yv̀:ngì. We gálòng taqkèní St. Rita vgo taqø mvnggang vna dø íwe bø̀n nø 8 nǿng døp we záyv̀:ng lòngí vtøp ké yv̀:ngà.
We vna zø̀mzá:mì mèpvng àng lvpat 64 nǿng AD 1450 taq Kristuò Jubilee bóy svng dìlv́m rvt ming (90) høq hí taq dì yv̀:ngì. St. Rita nø Yesu Kristuò dvshà mvhøt we tvrà svng cv́n dvgøm dvzaqshì we taqsó:rí àng lvpat 71 nǿng taq lvpat bé yv̀:ngì.
