Zunbóy (Paska) Nár (5) Lvban
Vpø’ íwe pèmè vnvmchvngmaq, yalvban nø, Vkangpè Yesu Zuná:mì ( Paska )Zun Bóy Nár (8) lvban vl yv’ngkèní (5) lvban wà lvban svng gòng bø’shà.
Yalvban Pvlàcè nònggùn lùshìlvm Gvray móngkà ciqrì nø;….
Mongkà tiqciq(1)
Dvzvr 14:21-27…. taq, Polo nvng Barnaba ní nø, Gvray gvsangí àngní lvnga yv’ng dvkv’m bø’à rì shvngbe svng dvtan nø dvshvngò dang yv’nglún shìe. Vrá nø, Rvwá vrvm, kàyv’ng màyv’ng Gvray dvbùshang Mongkà svng dvshvngò nø shvkse wáshìe. Dvzvrìo Nønt svng shvdìng shvngvng sórí Pvlàcè Kvmnønt tvrà taq Dø’ngvng dø cvndvgøm lúnlvm rvt shvdøm nø dvsha:tnòe, nònggùn zíò dang yv’nglúnshìe. Wè mvdvm Gvray gvsang móngdàn kaq shini mvgòng vzvng, dvshà mvhøt lvm rì, v-tu v-re lvm rì angpvn pvn vhø’m ràe, wā shvngøt dvtúòe, dvzi:tnò dang yv’nglúnshìe. Mvdò vrvm taq gø, øp kangshú shaqré shaqtvngrì svng rvcà:ngò nø, Vjúrøt we nvng Vm-aq sórí angníí angmaq kv́m bǿì pè Vkàngpè wur svng angmaq tvleò dang gø yv’nglúnshìe, Shálúnshìe.
Vpø’ íwe vnvmchvngmaq, Dvzvr Polo nvng Barnaba, àngní lvnga í Gvray dvkv’m Kà, Dìngman we Kvmnønt tvrà svng vtoshì lún yangà mvdvm, àngmaq tiqlvpat taqkèní Gvray móngdàn dvpvt vpnóngshì nø shvkse wáshì yangì pàdø dèni Na, Ngà lvpat taqkèní gø shvbóng shvmvtshì nø shvkse wáshì lúnlvm shvdømìe.
Mongkà v-ní ciq (2)
Dvtan 21:1-5…., Dvzvr Yohan í shingran yvngòe.
Muqlàng shvr, rvgaq shvr Gvray í dvtanò lòng svng yvngòe. Dari
muqlàng nv̀mlat lòng nvng rvgaq nv̀mlat lòng nø vleá:mì.
Shànshér we wamà Yerusalem àngshvr nø Gvray mvrdvng yv’ngkèní Muqlàng shvr tuq raì, wā Yohan í shingran yv’ngò dang tá lúnshìe. Gvray gvsangí nø angmaqò vne kèní neci rì shvngbe svng shøqā lúngòe, wàe, dvkv’mè.
Yohan 13:31-35… “Shóngnønt dvtan lvm dvkv’mè “
Yohan shøn we taq, ‘shóngnønt’ nø Nønt mvsøn kaq mvdøng vjá:ng nø shøn we tvrà nø mø-í. Ang shø’n mvyø’ we taq, “shvgùn shvringshì lòng nvng vpnóngshì lòng nø ” (service and sacrifice) ang lvjøm vl we shóngnønt tvrà rì íē, wàe. Shv’mná høpnønt nvng mv-wámshìlvm rì bung ra, vhø’mshì ra dvgvp rvcvngshìlvm rvzaqè. Vkangpè Yesu Hkristu í àng coqcvnri svng shøn we taq,
” Namaq tiq gǿ nø tiq gǿ nàshòngkénøng we, yalòng taqkèní namaq nø Ngà coqcv́n èínøng we, vsvng shvngbeí shá bǿòe,” wā dvkv’mè.(Yohan 13:35)
Vpø’ íwe vnvmchvngmaq,
Vkangpè lvpkà svng dvdvm vjáng nø; ” Gvray nø shóngnønt íe. Shóngnønt nø Gvray íe,” walòng svng yv’nglúnshì shálúnshìe. Rvzvngcerì nøngmaq gø’ vrvm gø, “Tìløp” Sacramentu Kvmshì lúnì yv’ngkèní Gvray gvsang dvbùshang mongkà svng, shóngnønt Dvrá rì svng dvshér lvm, shvkse wáshì lvm Talen jèjú gønpaq vtōshì lúnì we íe. Nà Ngà lvpat taqkèní gø Gvray mvrdvng, shvngømré vsvng mvrdvng Vkangpè Yesuò shóngnønt Dvrá svng vpø’ shvring cvndvgømì taqsórí shóngnønt dvtan lúnìe mà? Dìngman dø dvnúng lúnìe mà? Dvdvm vjángì taqsórí Kvmnønt Pvlàcè nònggùn kūnga lùshàì.
“Yesu í nø shóngnønt Dvrá àngshvr zi we “
Vkangpè Yesu í zi we Dvrá àngshvr nø:” Namaq tasvng tale Na shóngkénøng”, wàwe Dvrá lòng íe. Coqcvnri svng Vkangpè taqkèní lvngdøm lvpkà shø’n yangì. Ngàí Namaq svng shù:ngi pàdø Namaq gø tasvng tale vshóng ké ràe. Yalòng nø Yesuò dvkv’m Kà, Yesu kèní coqcvnri kaq svng bvnlì døngja tvle we nvng vmìng vkang zi kà (commandment) íē, walòng svng shálúnshìe. Vzàng kaq shvngømré rvzvngcerì í shvngømré kèní øp kanglvm lòng svng shvlá wā síngràl lúnòe. Yvklvm, mvhøtlvm nvng v-tu v-re lvm vhø’mshì rvtø, ” shóngnønt” nø té vtv’ng nònggùn kūnga vzàm ínø, rvzvngce mvrpong mvdò svng tùbù:m dvbvng lòng gø í á:mì. Wervt vzàng kaq rvzvngce mvrpong mvdò rì nø, yalòng Vkangpè Yesu dvkv’m Kà rì svng shvlá wā síngràl lúnòe. Vkangpè Yesu Hkristu í shvngøt dvtú we lvpkà Dvrá shvniq kà rì svng vpø’ shvring nø cvndvgøm sórí nònggùn kūnga lùshì yangì.
Yalòng nø Gvray móngdàn sasvna vháng nø jór lúnlvm nvmlat nvmhpang vpo a:mì. Wervt àngmaq svng yv’ng lúnò vsvng rì nø ” àngmaq tiqgø’ nvng tiqgø pàshaq í ni, vshóng ke raì” wàe.
Vrá nø, “Yesu Kristu Dvgùng Gùngshàng we dang”
Vkangpè Yesu Kristu nø jór dvgùng gùngshàng nø, Vpè Gvray gvsang gø Angcè pè taqø dvgùng gùngshàngè, wàe. Vkangpè Yesu nø wurgvng mvdvm shì bø’ì vrá Zuná:mì lòngì, jór dvgùng gùngshàng á:mì. Vkangpè Yesu coqcvnri nø tasvng tale vshóng ké nø shóngnønt, vpø’nøntní Yesu svng jór dvgùng shvring shvta lúnòe. Vkangpè Yesu Kristu shøn yangì we taq, “
” Namaq tiq gǿ nø tiq gǿ nàshòngkénøng we yalòng taqkèní namaq nø Ngà coqcv́n èínøng we, vsvng shvngbeí shá bǿòe,” wàe.(Yohan 13:35)
Vpø’ íwe pèmè vnvmchvngmaq Vkangpè dvkv’m Kà rì svng Dvzvr rì, shvngømré vgo pè dvzvr Piter, ang tvle Svrabín Koqkvm angdvtvng tvng àngmaq taqkèní Vkangpè Yesuò shóngnønt Dvrá rì svng, shvngømré svng kvmnønt shóngnøntní cvndvgømò nø shvkse wáshì pàdø, dèni Nà , Ngà rvzvngce lvpat taqkèní gø Vkangpè Yesuò shóngnønt Dvrá rì svng vpø’ shvring dvtanì taqsórí cúnshì laqlúni, cvndvgøm nø shvkse wáshì laqlúni…. wvng nònggùn zø’ng mvyøngè. Shvngbeí Vkangpè Yesuò shóngnønt mongzøl lòng vtoshì laqlúnì. Shvngbe svng oqā.
