Gvray Dìngman lòng svng vtoshì lúnlvm rvt nøngmaq gø’ vrvm, Nønt mvsøn Cìpshì lún ra íe.
Ngàí kàdøng v̄la:tnìni, vshuq nø angkàng mvdv̀m ring we mø̀í. Dvzv́r gø ang kaq dvzá:rò pè mvdv̀m ring we mø̀í. 17 Yadv́ng pv̀n svng namaqí èshánøng nø, ècv̀nnøng nìnø, ìshøt ìgv̀n èlún lóngnønge.
Namaq shvngbe svng shø̀n we mø̀í. Ngà rvcvngshìshaq rì svng Ngàí shángòe. Iwe Shànshér Kàru taq, ‘Ngà v́mpà vmpè ang híí Ngà svng pèlōnge,’ wa ciq dvhø̄mlv́m rvt íe. Wedø í long dvgvp, Ngà nø Kristu ǿngà we svng namaqí kv́mlv́m dvpvt, shini mvbø̀n ra dvgvp namaq svng Ngàí dvtáì we íe. Ngàí kàdøng v̄la:tnìni, Ngàí dvzv́rò gǿ svng vtoò gǿí nø Ngà svng nàtòng we íe. Ngà svng nàtòng gǿí nø Ngà dèzv́r dakngà pè svng vtōò we íe,” a:lòe.
Vpø’ íwe pèmè vnvmchvngmaq, Vkangpè Yesu í nø angí rvcvng bø’à gø’, goò gø’ kaq svng angí shvlá wā mvshvlòe, wàe. Rvzvngce tiqgø’, í bø’ì kvt nø Kristu svng nøngmaqí shá lún ra íe. Íni gø nøngmaq kaq svng shini me gō ì vzvng angí nø nøngmaq kaq svng vsháshaq íe. Nøngmaqò kūnga shaq vnø’nì rì, mvkø’m mvzøpmì rì shvngbe svng è shá í taqsórí rèzvng bø’shà we íe. Mvkø’m mvzøpmì we Na, Ngà svng rècvng bø’shà lòng nø àng taqø mvnggá vl lòng íe. Yalòng svng síngràl lúnlvm rvt nøngmaqò Nønt mvsøn bvngka svng tánshì nø Cúnshì we Gvray gvsang móngkà svng ni vrvm tashì lún ra íe. Dø’ng lòng nvng Gvray Dìngman lòng svng vtoshì lúnlvm rvt nøngmaq gø’ vrvm, Nønt mvsøn Cìpshì lún ra íe.
Vrá nø, Mvkø’m mvzøpmì we vsvngrì kaq svng gvzà gwà we mvkok dvdí shóngnøntní èshùng bø’shà. Àng Mvkok dvdí shóngnønt Dvrá svng síngràl lúnlvm nvng vkvtdø íwe shóngnøntní vrá cúnshì lúnlvm rvt dèni, rvtø vrvm vkvtdø cúnshì lúnìe. Dèni Gvray Mvkok dvdí shóngnønt svng Na, Ngào lvpat taqø vtoshì lúnlvm i mà? Nà, Ngào mvkø’m mvzøpm we lvpat taq wā mongzøl lúnlvm vlē mà? walòng svng dvdvm vjáng taqsórí dvcøp vdv’ngshì nø kūnga lùshàì.. wvng nònggùn zí mvyøngè. Shvngbeí Vkangpè Yesu Gvray Mongzøl lòng vtōshì laqlúnì.
