Yesu nø gø̀nshaq zidòng í we
Vpø’ íwe pèmè vnvmchvngmaq, Dèni tálúni we Gvray móngkà taq, Rvtø vrvm Vkangpè Yesuò gø̀nshaq zidòng Muk svng vpø’ shvring Vm-aq nø dvciq lvpat gønshaq Pvlàcè kūnga lùshì lúnlvm dvkv’mè.
Na , Ngà í nø Kristu Gvrayò cúnshì we Dvrá Mongkà svng dvdvm vjáng síngràl lú:nì we í nìnø, Gvray gvsangí nø, Kristu nvng vhø’m lúnlvm dvpvt nøngmaq kaq rvzvngshaq í bø’shà walòng svng shá v-duè. Shá lún shìe.
Nøngmaqò lvpat nø zaqle wang kaq búng we mèma lvpat nvng vbónge. Zaqle wang tvra svng dì nø búngì taqsórí ang lvjøm tvrà rì svng lá íe. Vkangpè Yesu Kristu nvng vhø’m lúnlvm rvt, Àng gønshaq tiqgóng shvngbe vpnóngshì zíshì yangì Mongkà svng tashì nø dvciq lvpat gønshaq Pvlàcè kūnga vtoshì lúnlvm dvpvt, nøngmaq nø rvtø lùshì, rvtø zíshì lúnlvm nø gvzà vchvkngè. Vrá nø, Dvdvm vjáng taqsórí røtkà rì røt we, wálún lvm gø vchvkngè. Ang tiqgóng shvngbe zíshì nø èchvng bø’shà we cúnshì we Gvray móngkà svng nøngmaqí ni vrvm á:mì we Vmpa pàdø Pvlàcè dvpvt Vm-aq nø vpø’ shvringlvm vchvkngè.
Vrá nø, Vmlvm aqlvm Vmpa ri nøngmaqí á:mì pàdø Kristu wàwe Pvlàcè gø̀nshaq zidòng (Muk) Vmpa svng vmshì kvtwa, vtoshì kvtwa dvciq lvpat gønshaq cúnshì lúnlvm vlē, walòng svng shvdømè.
Wervt, Ni vrvm lvpat taq Na, Ngà Pvlàcè gønshaq cúnshì lúnlvm rvt gønshaq zí lún we Gvray gvsangò móngkà, Kàgvp svng kadvngte vpø’ shvring nø Vm-aq lún ni mà? Vtoshì lúnì mà? Rvtø vrvm Missa, Vkangpè Kàgvp Pvlàcè gønshaq Muk svng Vm-aq taqsórí Ni vrvm lvpat taqø kadvngte Gvray mongzøl lòng ìshøt svng vtoshì lúnè? Dvdvm vjángì taqsórí Kvmnønt Pvlàcè nònggùn kūnga lùshì laqlúnì. Vkangpè Yesu angí narvngà bø’shà we Noqngøm Missa Kàgvp gønshaq Muk Sacramentu svng dòngnønt mvsøn, tiqgóng Shvngbeí, kvmnønt, vpø’ Nøntní shvring nø Pvlàcè kvmnønt nònggùn kūnga lùshì laqlúnì wvng dvshat mvyøngè. Shvngbeí Vkangpè Yesu Kàgvp gønshaq Muk ò mongzøl lòng vtoshì laqlúnì.
