” Zuná:mì (Paska) rvtø Nár (3)Nár
Vpø’ íwe pèmè vnvmchvngmaq, Ya lvban nø, Vkangpè Yesu Zuná:mì mèpvng Nár (3) lvban wà lvban svng gòng bø’shà. Dvzvrì mvdvm vshøm boq wà boq dvtánshì lvban gø íe. Ya lvban Rø vdu we Gvray Mongkà ciqrì nø;-
Dvzvr 5:27-32, 40-41
Angmaqí dvzv́:rì svng shøla:tnà dá:ngí Shaqré lìpòngmè mv́rdv̀ngø shvri:pmò nø, Yesu Hkristu bøng kèní shvngøt we mv-wàlvm rvt dvkv’mòe.
Piter nvng coqcvn rì, vtánshì we taq vsvng Kà tá lvm mvdvm Gvray gvsangò Kà mvng téwa tashì v-duè, wā vtánshì taqsórí shvkse wáshì dang tálúnshìe.
Dvtan 5:11-14
Dvzvr Yohan í yv’nglúnò we shingran svng pø’:n nø shø’nà we taq, Muqlàng dvzv́r loksok shøn kà svng Ngà í tá lúnòe; “Shvt yà:ngà we Vyv̀ngcè nø jórnònggùn gø, vdá mvgàm we gø, zitnøt rálnøt gø, nònggùn kùngà gø, Vpǿ shvringlv́m gø, dvgùng gùngshv̀ng nvng shvring shvtà we* gø lún vpǿe,” wae.
Yohan 21:1-19
Vkangpè Yesu nø shì yv’ngkèní Zun bø’ì mèpvng vshøm boq wà boq coqcvnri yv’ng dvtánshìe. Àngmaq nvng tiqdø Vm-aq è. Yesuí nø Muk svng luò nø coqcvnri svng zíòe, Ngā svng gø wè dø tiqdvchá zíòe. Yalòng nø lvngdøm Vm-aq bóy, Pvlàcè gønshaq Muk svng vpø’ shvring taqsórí nònggùn lùshìlvm shvdøm we tvrà íe.
Vpø’ íwe pèmè vnvmchvngmaq, Yesu nø, Tiberi tìnung coqcvnri yv’ng dvtanshìe. Vkvtdø dvtanshì we taq Vkangpè Yesu shø’nè. Piter nvng dvgá coqcvn v-ní pè nø, tìnúng yv’ngø Ngā poyaq gupmò nigø tiqgo gø gupmvlunò. Vsháng Gá lú:ngì dvgvp tìnúng shvnvng yv’ng Vkangpè nø rìpmè. Íni gø àngmaqí Vkangpè Yesuí we coqcvnri tiqgø’ ígø màmvshá:lò. Vkangpè Yesu ínø Namaq yv’ngø vmlvm tiqpvn pvn vlē mà? wā røtnòe. Àngmaqí mà-vl wā vtánshìe. Wekvt Yesuí shømgún svng kùngshìgøm kèní vbàng pa kaq dègupnøng, Wekvt namaqí ngā èlún daqnøngè, wā àngmaq svng dvkv’mòe. Wè dø tiqdvchá angmaqí dvgup bø’à nìnø, Ngā mvmè lúnbø’à nø, shømgún gø shvl mvdá:ngò høq ngā lún bø’à, wàe. Wervt Yesu shóngshì we dvzvr pè nø, Piter svng Vkangpè lví dvrì wā shø’nè, wàe.
Vrá nø, “Vkangpè Yesu í Dvzvr Piter svng røt Kà vshøm Kà taqkèní røtnòe”
Vkvt àngmaq Vsháng Vmpa vm dv’ngshì bø’ì mèpvng, Yesuí nø, Dvzvr Piter svng røt Kà vshøm Kà taqkèní røtnòe. Àngmaqí eshù:ng we taq, Nà í gø nga svng téwa eshù:ngàe mà? wā røtnòe. Vkangpè a, Ngà shóngshøng lòng nø Nà í téwa esháòe, wā vtánshìe. Vrá nø, Vkangpè Yesuò dvkv’m Kà vshøm Kà vlē.
(i) “Ngào vyv̀ngré rì kaq svng shèv́mangà, wàe.(ii) Ngào vyvngré rì kaq svng èrokngāngà, wàe.
(iii) Ngào vyvngrérì kaq svng shèvmangà, wā dvkv’mè. Ya dvkv’m Kà rì nø Dvzvr Piter svng øpkang lvm vmìng vkang jèjú gønpaq Talen døngja svng zíò lòng íe. Vkvtdø vshøm boq Dvzvr Piter svng røtnò rvt, Piter Nønt dvsha nø, Vkangpè a Na nø ídv’ngte shvngbe svng esháòe, Ngà Na svng shóngshøng lòng nø Na í téwa esháòe, wā vtánshìe lòng svng yv’nglún shìe.
Yesu í, Piter svng dvtut shøn we taq, Ngàí nà svng kàdøng v̄lvtnøng, nà gùchàngré èí dvgvp nø, nà nø nà wa juqnv́m ènv́mshì nø, kayv́ng di mèyǿ nìnø weyv́ng svng dí èlú:nòe. Iwe nà cèrǿng ra dvgvp nø, nà wur nàgàng nø, Vsàngí nà svng juqnv́m ènv́mavt nø, nà di mèmèyǿ yv́ng svng èshøl bø̄e,” a:lòe.(A:ngí yadø shø̀:nò we nø, Piter nø kadødø shì weí Gvray ngø̀r dvgùng shvring lúnlv́m í we gø̀mla svng shingran dvta:nò kà íe.) walòng svng yv’nglúnshìe.
Vrá nø;-
“Missa Kàgvp nóngpà Shvrúng lòng svng vnvn taqsórí shø’nè “
Dvbùshang Mongkà taq Missa Kàgvp nóngpà Shvrúngà lvm dvpvt mv-ngushì lòng svng (ròráshaqí) Kàdøng taqkèní shøn lòng vlē.
Missa Kàgvp taq nøngmaq nø Pvlàcè Vmpa vmìe. Muk nvng Brimtì nø Shànshér Pvlàcè kūnga vzàm kèní Vkangpè Yesuò shing nvng shvwi jø’nggvp vpōá:mì. Yalòng nø Shànshér we Catholic shvngømrémeò Kvmnønt angké lòng í á:mì. Noqngømì dvgvp, Muk nvng Brimtì svng Kàgvp nóngpà Shvrúng ra jàm mvdvm vp tvleshìe. Nøngmaqí vp tvle i we gønpaq Muk nø, Rvgaq yv’ngkèní vtoshì lún we mvsi dvyø vsvngí wàì we Muk íe. Brimtì nø, Brimrø taqkèní lúnshì we vsvngí wàì we Brimtì íe. Yalòng Shvrúng gønpaq rì taqø, Vkangpè Yesu Hkristu nø àng dvgoqshi lvm shvra vpōá:mì.
Wervt nø, pèmè vnvmchvngmaq Missa Kàgvp nóngpà nóng we tvyø rì taq lúm lú:ngì dvgvp;-
(1) Vpø’ shvring taqsórí lúm ra íe.
(2) Kvmnønt taqkèní lúm ra íe.
(3) Nønt mvsøn tiqgóng shvngbe tvleshì nø lúm ra íe. Mvdvm kaq dvtanshì rì svng vpø’ shvring cvndvgøm taqsórí kvmnønt kūnga lùshì laqlúnì wvng dvshat nø nònggùn zí mvyøngè.
Shvngbeí Zuná mì we Vkangpè Yesuò mongzøl lòng vtoshì laqlúnì. Shvngbe svng Pàmvrà.
