St. Joseph The Worker
1955 nǿng Mvngǿr shvlá svr 1 ni taq Catholic Bv̀nlì mvdò (Workers Group) svng Italy móngdàn taq mvsat shvdøng yv̀:ngà we íe. We mvdò vrvng shìyv̀:ngì we (10) nǿng gøm muqhǿm lìpùng mè svng gø St. Peter noqngø̀m tø̀mø wáshì yv̀:ngì.
Pope Pius (12) taqkèní St. Joseph ò àngni May (Mvngǿr shvlá) 1 ni svng bv̀nlì wa vsv̀ng rìò àngni wanø dvrá shv̀ng mvsat ráà wegø íe. We ni nø mònggv̀n døngtv́ngò bv̀nlì wa vsv̀ngrì (Labor Day/ May day) wanø bø̀n ráì we íe.
Pope Pius taqkèní mònggv̀n vsv̀ngrì kaq “Nàmaqò vlǿmshì rà, roqgvr shú àngpè tiqgǿ vle” wanø̀ vrìng ráà.
St. Joseph nø tvmø bv̀nlì wavm we vsv̀ngrìò vlǿm rà gø íe wawe lvjøm svng dvtú mvyǿ we íe. 1889 nǿng taq Pope Leo (13) í St. Joseph nø tvmø bv̀nlì wavm vsvng rìò shv̀nshér vsv̀ng tiqgǿ íe wanø̀ vtàn ráà we íe.
Pope Benedict (15) taqkèní gø tvmø bv̀nlì wavm vsvngrì kaq St. Joseph kaq vlǿm shìnø àngò nøt laqyà rì nø cvnshì shvla we dvng dvtú yv̀:ngà Pope Pius (11) ígø St. Joseph nø Nazareth taq vlwe tvmø bv̀nlì wavm vsvng rìò shv̀nshér vsv̀ng íwe nvng mvnoq mvkv́m we vsvngrì kaq vgám we shv̀nshér vsv̀ng íe wanø̀ shvngøt dvtú yv̀:ngà we íe.
St. Joseph àng nø tvmø bv̀nlì wavm vsv̀ngrì nvng dvshà vsv̀ngrì zìdang kèní shv̀nshér we døngku svng vrang nø shølshú tiqgǿ wáshì ráì we íe. Àngnø tvmø bv̀nlì wavm we, vyv́ng zìbe vmwe bv̀nlì rìí dvkú:mshì vsv̀ng rì dvpvt vlǿm rà shv̀nshér vsv̀ng tiqgǿ wanø̀ mvsat shìwe gø íe.
Pope Pius (12) taqkèní St. Joseph ò àngni svng May day taq mvsatò nø̀ tvmø bv̀nlì wavm vsvngrì ò dvgùng shvring lv́m, àngmaq ò lún vkángrì, vdu vbóng we dvrá rì lúnlv́m wawe mvtú kèní wáshì we íe.
Nazareth kèní Joseph nø tvmø bv̀nlì wavm vsvng rìò vlǿm rà, chø̀m døngku vrv̀mò roqgvr shú vlǿm rà shv̀nshér vsv̀ng tiqgǿ íwe nvng àng yv́ng svng vlǿmshì we tiqgǿ vrvm nø àngò roqgvr we jejú vtoshì lún we íe.
