Coqcv́n rì svng Vkangpè Yesu dvtánshì we (Luka 24:35-48)
Vpø’ íwe pèmè vnvmchvngmaq, Ya rvtø Paska Zunbóy rvtø lvngcha íe. Dèni dvdvm vjáng taqsórí nònggùn lùshìlvm Gvray dvbùshang Mongkà nø Luka 24:35-48 vdòng taqkèní íe.
“Coqcv́n rì svng Vkangpè Yesu dvtánshì we”
Vpø’ íwe pèmè vnvmchvngmaq, “Nga svng nakòqsha Nga øngàe walòng svng namaqí ni èyangnøng.” wā shøn Kà svng tálúnshìe.
Emmaus rvwá kèní coqcvn v-ní pè í tvrà rāmø yvng bø’à we Zuná:mì we Vkangpè Yesu tvrà svng dvzvr vgo pè nvng dvzvrì àngmaq tāsvng tālè dvmvn dvgvp Vkangpè Yesu àngmaq shvngbe mvrdvng yv’ngø dvtanshì daqì. Àngmaq mvrdvng yv’ngø Vkangpè í nø Kadøku àng tiqgóng svng vkoq dvzvrè mà? Dvzá:rìo Nønt mvsøn vdòng taqø Vkangpè nø shì bø’ì, Pàgø shønlvm mà-vl bø’ì, vdv’ngá:mì wā dvdvmòe. Ínø gø Vkangpè nø àngmaq taqø dvtut gømlā dvtanshìe. Íni gø angmaq taq dvdvm Nønt rì, Nønt mvsøn vdòng Nønt dvt Nønt yòr lvm, vhø’m bø’à rì shvngbe svng tvlíng lúnlvm rvt mvyòr, rvzaqè. Àngmaq taqø Vkangpè Yesu dvpvt Nønt dvt Nønt yor lvm rì mv-be, Vkangpè Yesu svng Cang minlā wā dv-tú we gø vhø’m yangà, walòng svng gø shálúnshìe.
Vkvtdø gømlā rì dvtan we taq Vkangpè svng Cang wā dv-túòe.
Vkvtdø dālvm gømlā rì taqkèní dvtanòe. Íni gø àngmaq Nønt vdòng taqø Dìngman lòng svng lá mvlunò. Vkangpè Yesu nø shì yv’ngkèní Zuná:mì jór á:mì pòngbang lòng svng dvtanòe.
Àngmaq kaq Vkangpè Yesuò góng svng zø’m dvzvròe. Shú:pm dvzvròe. Àngmaq Vzvngø jø’ngjøng Dìngman lòng nø Vkangpè Yesu wā íe. Àngmaq yv’ngkèní vmlvm aqlvm røtvm sórí zánglvm Jang gø røt nø Vm-aq è.
Vrá nø, Vkangpè Yesuí àngmaqo Nønt mvsøn rì vtan lúnlvm rvt Mongkà rì svng pø’nàòe. Vkangpè nvng singdø bønbung bø’ì we, mvbøn tvrà rì shvngbe svng síngràl lúnlvm rvt Mongkà nø mà-vl mvdaq í a:mi. Àngmaqí síngràl lúnò wèò chàng, Móng Dø’ngtáng svng dì nø Kristuò dvbùshang Mongkà svng dvshvngòe, Vkangpè bøng taqkèní Nønt vwángshì lúnlvm, Mvra vdòng kèní lutshì nø Gvray mongzøl lòng vtoshì lúnlvm dvshvng bø’à.
Vpø’ íwe pèmè vnvmchvngmaq yalòng nø Àngmaqo Nønt mvsøn nvrøm svng vjvngshi dvzvr we í, Yerusalem Myoq wama kèní Gvray bvnlì àngshvr svng wà bø’à. Wè dø tiqdvchá dèni nøngmaq gø’ vrvm kaq svng gø Vkangpè Yesuí ego íe. Nøngmaq lvpat taq tálúnshì we, yv’nglúnshì we, dvtøp lún we, síngràl dvzvr we, Nyan Bvnya kūnga vzàm Shànshér Pvlàcè taqkèní è zí íē. Wervt Vkangpè Yesuò Dìngman lòng svng dvzvrì í vjáng nø angmaq tiq lvpat taqkèní dvshvng nø Shvkse wáshì yangì pàdø nøngmaq lvpat taqkèní gø Vkangpè Yesuò Dìngman we Kvmnønt tvrà svng dvtøp vjáng taqsórí jór kūnga lùshì nø dvshvng laqlúni, shvkse wáshì laqlúni wvng nònggùn zí nø dvshat mvyøngè. Shvngbeí Vkangpè Yesuò Mongzøl lòng vtōshì laqlúnì.
