” Vm-aq vnatshi Nár (3) Nár “
Ya lvban nø Vm-aq vnatshi rvtø lvban (3) lvban wà lvban svng gòng bø’shà.
Yalvban taq rø vdu we Gvray gvsang móngkà ciqrì nø;
Búngám 3;1-8a,13-15
1Korintu 10:1-6, 10-12
Luka 13:1-9
Vpø’ íwe pèmè vnvmchvngmaq
Nønt vwángshì lúnlvm mø-í ni vcat lvm dang shvdømè.
Vm-aq vnatshi Nár (3) lvban wà lvban svng gòng bø’shà dø tiqdvchá Vm-aq vnatshi rvtø taq nøngmaq kaq svng Gvray móngkà taqkèní shvngøt dvtú we nø, (1) Vjúrøt shi lvm dang íē, (2) Vm-aq vnatshi lvm, (3) Shvla we jèjú bvnlìrì wà lvm, (4) mvré za bvnlìrì wàlvm, yarì íē. Vkangpè Yesu Hkristu shvngøt dvtú we móngkà taq mvdøng nø Nønt vwángshì lvm walòng íe. Rvtø mvmè nø ya dang taqkèní dvbé sháìe. Jø’ngjøng èshøn lúngò dvgvp Nønt vwángshìe, walòng nø gvzà ni vchvkè. Vkvtdø Gvray gvsangò jèjú rì svng dvtit tvleā we dang íe.
Pilat monggyi pè í nø Galili vsvng tiqmaqò shvwi svng, àngmaq í núngò we Shvrúng nóngpà nvng vshúòe. Yadang svng Yesu yv’ng shønòe. Galili vsvngrìo mèpvng, shø’n mvyø’ we taq gvzà ni Nønt mvbyōlvm tiqlòng ni íe. Màná Dømrø bø’n bungá:mì. Shvlá wā shvzøm we wá màlún we taq Vha vjvngshi lvm bø’n bungè. Kashvbong;(Luka 13:6-9)
Mongkà (1) ciq
Dèni rø vdu we móngkà (1)ciq nø Búngám kàru taqkèní íe. Gvray gvsang nø vcar we Svmi mvlàm yv’ngkèní Moshi svng gōòe.
Egutu móng yv’ngø v-du vre lvm vhø’mò we Israel dvcirì svng chutchvng lúnlvm dvpvt, Gvray ínø Moshi svng Talen døngja zíòe. Gvray gvsang ínø Ang bøng svng Moshi kaq shø’nàòe. Wè pè nø, ” Nga øngàe”, wepè nø Nga ni øngàe, wàe. Yalòng nø dvciq lvpat gønshaq Gvray gvsangò bøng ni íē. Tiqmvral nvng tiqmvral Gvray gvsangò mvsvt døngsvt ang bøng íē, walòng íe.
Mongkà (2) ciq taq nø
Dvzvr Polo í Korintu shvngømré rì kaq svng shvri we móngkà taqkèní íē. Dvzvr Polo ínø Korintu shvngømré rvzvngcerì kaq svng Nønt vwángshì nø vdv’ngshì lvm, Vkangpè mèpvng vwángshì lúnlvm dvpvt shvdømè. Dvzvr Polo ínø Búngám kàru svng mvtuò taqsórí shøn we nø; ídv’ngte shvngbe nø wè rvmøt nvng tìnúngø Moshi nvng vzø’m vzap lvm rvt Tìløp Kvmshìe. Dālvm lúngsùng taqkèní àngmaqí tì aqlvm lúnò nø, wè lúngsùng nø Hkristu ni íē, walòng íe. Nøngmaqò vkopvkangmaq nø màshvla dang taqø Nønt vlín pàdø, nøngmaq Malín lvm ya dang nø nøngmaq dvpvt dvgùng kūnga lùshì lvm í bø’ì.
“Namaq gø nøt mèlíngshìnø̀ng kvt kèní nø, welòng døni shvngbe nàmv́ng lóngnønge,” (wā) a:lòe.” ( Luka 13:5 ) dvkv’mè.
Wervt Vpø’ íwe vnvmchvngmaq Vm-aq vnatshi rvtø taqø Gvray gvsang Mongkà kèní dvkv’m dø tiqdvchá cvndvgømì lòng nø, Nønt língshì nø Vkangpè mèpvng cvnì lòng, Pvlàcè shagóng kvmnønt nònggùn kūnga lùshàì lòng íe, wà Kà íē.
