Cvmrérì Angpè Angmè kà tálvm dang
Kà tāwe cvmré tiqgø ílvm kadø dvzøm mvkoq dvtélvm waì ni wang nø tiq dungcè taqkení dvshvt mvyønge.
Angpè Angmè taqkení vdèò angcø angcèrì svng shvla dø wáā ìdø, nònggun zí kà shønāìe, yadø tvrà shøl we dang nø nøt tøng lvm shvla dø laqya vlhøq shølì we íninø laqya shvla nø kà tāwe cvmré tiqgø dvshaqí vlíngv:me. Cvmrérìò shvla we laqya shvla rìsvng eyvngò vrvm taq v-le gvza jòámì wanø nònggun zí shvrìngò wenø angmaqí vrá zvn dvtut shvla we dang svng màvnálvm dvpvt Angpè Angmè kà tāwe cvmré tiqgø ílvm (7) dang taqkení dvshvt mvyønge.
1, Cvmàrérì svng rvtø zí ràe.
Cvmrérì nvng lega rø rvtø, kà shøn rvtø rìtaq cvmrérì svng bùno nø nònggun ezíò. Yadø waò we dang nø pagø mvídø vshvme ínìgø shóngnøt nvng kámnøt télúno weí cvmré nvng Angpè Angmè dvhø té vzøm vzvp lvm dang télún shìe. Angpè Angmè nvng angcø angcèrì dvhø kám vrvmlvm té vlnø relationship wawe dang taqkení cvmàrérì svng shvngøt we ang mvtú vlwe dang gø íe.
2/ Role model ílvm gø vchvtnge.
Laqya shvla nø shaqré kà tāwe cvmré tiqgø ídvzvr mvyøni vdè nø angmaqò role model ílvm vchvtnge. Angpè Angmè taq angmaq cvmàrérì í, cvnshì lvm shvla we laqya rìsvng yvngshì dvzvr rae. Nøngmaqí waì we dang nvng kà shønì we dang págø màvbúngámì ninø laqya shvlá rì dvtvn ìwe mvíámì. Angpè Angmè maqí cvmrérì møl taq sanpyaq butgu dø tvrà shølì we íninø laqya shvla we cvmrérì ídaqe. Nøngmaq gvza shvla døcè kà shøn ìni íninø cvmrérì gø wedø tiq dvchá cvn daqe.
3/ Dvtú rawe dang
Angpè Angmè taqkení vdèò angcø angcèrì svng kadø dvtú raemá wani vpèá gvza oqa íe ewa kà svng tá ngò ninø gvza dvbùnge. Na gvza dvrøq ninø vpè gvza nøt mvbyònge. Vkvt wedø shvngøt dvtú ò íninø cvmrérì gø angpè angmè maqò dang taqkení dvdvm shálúngòe. Cvmrérì svng gø angmaq shóngshi we dang vdè sháshì høq shvngøt dvtú dvbvng rae. Mvgam mashvla we laqya dvtvn shìkè dvgá rvmnvngrì mvdvm kadø ídvzvr we svng sháòdø shvngøt dvtú rae.
4/ Shvgún shvring rawe.
Cvmrérì gvza shvla mòngzøl dø gvsøp mvnshì we svng eyvngò rvtø taq wedø shvla we dang svng gvza shvlae lé, wanø shvring rae. Tiqkvt gvza mvhøt we rvtø rìtaq attention gvza shøn mvdaq. Cvmrérìò positive behaviour svng té focus wáā rae.
5/ Vdè de svng cvmré tiqgø dø sòn shìrae.
Cvmrérì nvng té mvngòshì lúnlvm dvpvt cvmré tiqgø dø sòn shìrae. Angmaq dø tiq dvchá evl nø dvdvm shì shvbúng shvmvt shìkvt wa angmaq nvng vzøm lúnshì nø angmaq svng laqya shvla rìsvng dvtvn lúnlvm té yòl we íe. Adèí shvngøt dvtvn dø dvbú nø byóbyò wacè cvnshì daqe.
6/ Angmaq kà svng táā rae.
Cvmrérì shøn we kà svng táā ìnø cvnā kvt wa angmaq svng shóngshie vpø shvring dárì wanø nøtshøm vme.
7/ Gvdiq di rae.
Nøngmaqí shønì dø dvtú ìdø táā nø cvnì kvt Gvdiq die màvyā dvleì wa nøngmaq svng kámvrvm nø té vpøshá lùnge. Wekvt wa shvla we laqya svng cvnlvm nònggun lúndaqò nø zvn dvtut laqya tiqpvn dø dang vrvm taq tøptøp wásha nøt tøng we cvmrérì ílùnge. Wervt kà tānø laqya shvla we cvmré tiqgø ídvzvr mvyøni nø mvdvmø shøn bøngà we tìyø rì zøm svng we svng dvshvt we íe, shvngbe svng oqa.
