St. Patrick
St. Patrick nø Ireland ò dvzv́r bv̀nlì wawe tiqgǿ íyv̀:ngì. Àngnø Brittany kèní Roma dvcì tiqgǿ gø íe. St. Patrick ò àngmè nø St. Martin ò àngrì àngrvp tiqgǿ gø íe. St. Patrick àng lvpat 16 nǿng taq Irish cèl rì taqkèní gvsat nø móng vsvng rì kaq tv:pmò rvtø̀ taq St. Patrick gø vbá yv̀:ngì we íe.
We rvtø̀ St. Patrick nø Dalaradi mvrìng shaqré tiqgǿ yv́ngø vyv̀ng roqshú wáshì nø 6 nǿng høqshaq v̀l vdu yv̀ngì we íe. We mèpvng vtshì nø Brittany svng tùng dinø̀ shvrúng shú zùng taq v̀l yv̀:ngì. St. Patrick pvlàcè tvrà nvng vjúrøt shìwe bv̀nlì tvrà taq gvzàni kù:ngà káng yv̀:ngì wegø íe.
Cø̀mla hang pvrà rì svng noqwe Irish vsvng rì kaq gø shvngøt dvtú yv̀:ngà. AD 430 nǿng taq Svrabín koqkv́mpè Celestine 1 England Svrado gvbà Baladious kaqsvng Ireland móng kaq Scotland dvcì rì dvpvt dvzv́r yv̀:ngà.
England móngdàn kèní vrá vtáng ráì wekvt Svrado gvbà Baladious nø lvpat bé yv̀:ngì. Wervt Shvrúng shúpè St. Patrick kaq svng Svrado vya kv́mā yv̀:ngà. St. Patrick nø Svrado vya svng kv́mshì bǿì mèpvng àng vshuq wáshì yv̀:ngì we Ireland móng svng vrá dvbùshvng bv̀nlì dvpvt ngang yv̀:ngì we íe.
Àng v̀l yv̀:ngì we Ireland móng tìni lvpmø rung nø Gvray dvbùshvng mòngkà dvshvng yv̀:ngà we íe. St. Patrick àng taqkèní wedø íwe dvbùshvng bv̀nlì rì wálún we nø Miracle kù:ngà kèní wálún we íe wanø̀ vtàn ráà we íe. Wervt (Saul) Sabhall wawe shvrà taq noqngø̀m chø̀m tiq chø̀m svng vrvng ráà wegø íe.
St. Patrick àngí vshø̀m góng tiqgǿ Gvray tvrà dvng shvngøt dvtú nø cømla hang noqwe vsvng rì kaq gø vgám ráà we íe. St. Patrick àngò dvbùshvng bv̀nlì, shvngøt dvtú we tvrà rì nø tiqni mvdàm tiqni témvn shì ráì nø Leoghaire Gv̀mzø̀ koqkv́m pèí gø St. Patrick kaq svng Christu ò dvbùshvng mòngkà svng dvshvng lv́m vko vkáng rì zí yv̀:ngà.
Wervt Ireland móngdàn vdòng taq Kristu ò dvbùshvng mòngkà nø móngdøng tv́ng vhú yv̀:ngì we íe. St. Patrick í Magrificent Hymn zàywà shaq rìgø mv́n yv̀:ngà nø gvzà bø̀ng shvng yv̀:ngì we íe. St. Patrick nø dvbushvng Sasvna bv̀nlì taq 7 nǿng døp dvzaq shì yv̀ngì nø téwa Ulster, Meach, Leinster, Limerick rvgaq rì taq Gvray ò nvmik gømla rì gø dvtvn ráà we íe.
Wedø dvbùshvng bv̀nlì tvrà taq St. Patrick àng kaqsvng tvpmò nø tung shvrú:ngò we rì gø vhǿm yv̀:ngà. Tiqkvt kvt àng svng shvtlv́m vjø:nò we høqshaq íwe dvjà rì kèní gø lutshì lún yv̀:ngà we íe.
AD 439 nǿng taq Svrabín koqkv́mpèí St. Patrick àng yv́ng svng Svrado 3 gø dvzv́:rò nø vcù:ngò we wàyv̀ngà. 2 nǿng vle bǿì mèpvng St. Patrick àngò bv̀nlì mvtú rì svng Svrabín koqkv́m àngké róng kèní shálún bǿà mèpvng nø we shvrà rì taq shvrúng shú zùng rì, paqzí zùng rì poqò nø dvbangā ráà we íe. St. Patrick àngò dvbùshvng bv̀nlì mvshǿl nø Europe móng rì taq vtang kèní bø̀ngshv̀ng ráì wegø íe.
AD 493 taq St. Patrick béyv̀:ngì mèpvng Ireland móng køp nø shvngø̀mré nvng kv́mnøt tvrà taq ngàngdøng dø rip ráì wegø íe.
