Kù:ngà vnǿn we vdòng kèní nònggùn káng we
Vsvng wa we nø nòngggùng kù:ngà káng mvyǿ we vsvng rì wani íe. Kù:ngà vnǿne, cǿm vnǿne wa lòng svng gø mvshóng wám shì we vsvng rì wa ni ílonge. Wervt yalòng nø vsvng rìò vtóng laqyà tiqlòng ku ni íe. Kù:ngà káng we nø vsv̀ngrì mvdàmø gø dvgùng vl we íe.
Welòng nø chvpdvp taqø rvtø̀ yv̀:ngùng pv̀nyv̀n vl lún shvlae wa lánshì we ínìgø dvgá tiq tvrà ku vlíng vpo longwe íe. Vsvng rì mv́r taq nø kù:ngà vle wa lv́nshì dø, gvzàni nøt mvsø̀n mòngzø̀l dø lv́nshì we ínìgø vsvngrì taqkèní mvyv́ng lúnshì we dòng nøt mvsø̀n tiqtong taqnø vsháy we tvra rì vl longwe gø íe.
Satan pè ígø wedø íwe tvrà kèní dvløt gvzàm we íe. Ang taqkèní mvbǿndaq we tvrà rì kèní èlinì nø dvløt gvzàm we íe. Shvngbe svng vsvngí wálún, wádvnglún shìe waku yv́ng dvzv́r, síngshá vlé dvzv́r we íe.
Wervt vdè góng vdè kadvgvp gø vchángshì ràwe nø vdè góng, dòng nøt mvsø̀n taq bø̀nwe kù:ngà vnǿn we tvrà rì svng døngmvn dø jòwe tvrà ku vdè góng vdè vchángshì lúnlv́m tvrà íe. Vsvng wa we kagǿ taq ínìgø angmaq vdè ò lvpat taq vkǿn nø vshøp we mà shvla we shvrà tiqdang dangcè wa we nø wedøni vl longwe íe. Welòng svng vle mvlúnò we vsvng rì wa íshà e.
Téwa welòng kù:ngà vnǿn we, màshvla we dang svng mashì sháì we nvng kadvgvp gø mà vtán shàì we íe. Vdè góng vdè gø wedø íwe dang svng ma shàì nø dvcøp shvnvp shìlv́m tvle dvgá lvp svng mv̀ng nøt gv́l shàì we íe.
Wervt vdè nònggùn kù:ngà vnǿn we tvrà kèní kù:ngà, nònggùn káng we lòng svng vtoshì lúnlv́m dvpvt rvt vdè ò vdèò kù:ngà vnǿn we tvrà rì svng mvma shì nø vchv̀ng lv́m vchvk we íe. Téwa nø vdè góng vdè svng ma shì mvdaq we íe. Tiqgǿ nvng tiqgǿ gø wedø íwe kù:ngà vnǿn we tvrà rì taq tubùm dvbangā ké shvla we íe. Mà shvla we, vdè dvpvt shagóng, nøt mvsø̀n kù:ngà vnǿn dvzv́r we nøt mvsø̀n laqyà rì nø vdè tiqgǿ taqkèní wa dvshér shì, dvcøp shì ràlong we gø íe.
Wedø kù:ngà vnǿn we tvrà rì svng shádǿm shìwe yv́ng kèní dvcøp shvnvp èlúnò we nø té wa kù:ngà kángwe tvrà svng vto shì shvla we íe. Vdèò tòni nøt mvsø̀n, laqyà rì kèní shvng shvng wa èvl we nvng vdè góng vdè síng shá shì we yv́ng kèní wa vdè lvpat tvrà svng gø vlíng vpo lún we íe.
