AD 2025 nǿng nø nøngmaq shvngbe dvpvt jejú ìshøt dv̀n zø̀ngwe Kàngpè Yesu ò Jubilee nǿng íwe dang Svrabín koqkv́mpè Francis taqkèní shvdǿm we
Sarabín Francis taqkèní ya AD 2025 nǿng Kàngpè Yesu ò Jubilee nǿng vdòng nǿngmaq rvcángcè rì nø chutcháng we tvrà svng mvrøt shàì nø̀ Kàngpè Yesu ang nvng tiqdø mvngu shàì we tvrà taq tiqkvt vrá nøt mvsø̀n àngshv́r wáshì lv́m vko vkáng svng èzíì we dang vtàn bǿà we íe.
Yesu àngí kà dvtut shú Esaia ò kà rì kø̀mzøp ráì we dang vtànò nø retø̀ àngnǿng rì kèní dètú ráshà we íe. Wedø vtàn ráà we nø angò kà tawe vsvng rì kaq nøt cun dvtøp shìrà we dang kèní dvtú we gø íe.
Svrabín Francisí àngò mòngkà kèní dvdam dvtøp shì shvla we tvrà tiqlòng vtàn vtnà we taq “Yesu Kristu ang nø ang vdè nvng mvsingwe bv̀nlì døngjá svng rinø, ang tiqgóng svng cipshì we nøt mvsø̀n kèní shǿng køm rvmø shú pèò àngcè ku, mǿí ni ang nø jø̀ng jǿng ni Gvray Gvsang yv́ng kèní àngò vsvng rì kaq svng chutcháng lv́m dvpvt dvzv́rvt nà we Meshíá íe má? Shìwvt mvrà dǿng kèní jø̀ng jǿng ni shvlút lún pè íe má? wanø̀ røt kà kèní dvdam dvtøp dvzv́r we íe.
Vrá nø Svrabíng Francis taqkèní Nazareth mvrìng kèní vsvng rì nø Yesu Kristu dang svng kadángte síngsháò we nvng angmaqò nøt mvsø̀n bv́ngkà rì svng Gvray kaq síngshá lv́m dang kadø wa ttv́na ráà we svng shǿn vtànò we íe.
Dèni rvtø̀ taq nøngmaq kaq svng Gvray shv̀shér kàru rì kèní rvcángcè rì kaq Kàngpè Yesu dang kadv́ngte síngsháì we svng dvtøp shì ràwe dang shvdǿm wegø íe.
Svrabín Francis taqkèní Yesu Kristu nø Kàngpè Gvrayò àngcè jø̀ng jǿng íwe nvng nøngmaq kaq svng chutcháng shú pè íwe dang kv́mì we dang vdè góng vdè gø cun dvtøp shàì wanø nònggun zi mòngkà kèní dvtú wegø íe.
“Nazareth pè Yesu shø̀n yv̀ngì kà rì, vko vkángrì svng nøngmaqí kadø wa vto shàì we ímá. vrá nø Yesu àng taqkèní kagǿ taqkèní gø zía mvlún we chutcháng we tvrà svng zía lúnpè íwe dang nøngmaqí vto shàì we ímá wanø̀ røt kà kèní shèdǿmì we íe.
Wervtnø̀ Svrabín koqkv́mpè Francis nø chutcháng we tvrà nvng singnø̀ nøngmaq tiqgǿ vrv̀m taq rà vchvk we nøt cun dvtøp shìràwe dvng rìsvng shvlá wa nøt cun dvtøp shì lv́m nvng ya nøng AD 2025 nǿng nø nøngmaq shvngbe dvpvt jejú ìshøt dv̀n zø̀ngwe Kàngpè Yesu ò Jubilee nǿng íe walòng svng dǿm sháì kvt kèní wa jøng jǿng ni jejú ìshøt rì vtoshì lún daqì we dang shǿn vtàn bǿà wegø íe.
