Mati 1:18-25
Vsv̀ngrì ò nøt mvsø̀n laqyà rì svng èyv̀ngvtnò dvgvp tiqdv́ng vsv̀ngí vdè kaq svng shvring rawe svng gvzà shóngshàì we svng yánglún shìe. Vsv̀ngí shvyǿm rawe svng mvshóng shàì. Wervt wedø shvyǿm we svng mvshóng shìwe vsv̀ngrì nø vdè góng vdè vyáshì taqsórí vlwe íe.
Tiqdv́ng vsv̀ngí vdè ò kù:ngà vnǿn we tvrà tiqdvng dvng svng tènù:ngvtnì dvgvp tá mvshóng shàì. Vdè taq mǿí we tiqdvng dvng kèní shvyǿm rawe, vtù rawe dvgvp téwa shv̀mná vsorì nø mvshóng shàì we íe. Wedø vdè svng shvyǿmwe, vtù we wáshì long dvgvp vdè taqkèní vrá tvle teq shàì we ínìnø we lòng nø laqyà shvlá tiqlòng mǿí wanø̀ shǿn lúnshìe.
Pàwálv́m wani Yesu Kristu àngíni mvrà màdá wurgáng mvdàm gø̀nshaq zíshìnø àngsvng dvki vrènø̀ shvtnò we vsv̀ngrì kaq høqshaq mvrà chutā yv̀ngà wesvng yv́nglúnì we íe. Dèniò mòngkà taqgø Yoseph í nø cv̀mré góng íwe Mari svng àngchø̀mè tiqgǿ ku vto rà bǿì we svng shábǿà wekvt kagǿ svng gø vtiqnø̀ mvrà lawe mv-vl àngwa zø̀m wacè Mari nvng vsvr we rvgaq svng yilshì lv́m dvdam bǿà. Ínìgø làngdø̀m taqnø cipshìwe àngò nøt laqyà, Gvray kaq kv́mnøt, kà tawe taqkèní Mari svng vtoshì nø dvzøm yv̀ngà we íe. Yesu Kristu nvng Yoseph ò laqyà rì shvngbe nø zitnø vl vsvng ò laqyà rì íe.
Nøngmaq vdèò lvpat tvrà taqgø yadø íwe dvjàrì vhǿm lú:ngì wekvt vto shì mvlún lú:ngì wekvt, mà shvla we tvrà svng shvla we dang kèní vtoshì mvlúnì wekvt zitnøt vl vsv̀ng bǿn mvlúnì. Vpǿì we vnvm vchvng maq ngà vdè wa døngmv:ne, ngà taqkèní wa:ngò long wani jòe wawe nøt mvsø̀n rì taq zǿmshì we mvwá shìlv́m dvng vrvm taq shvla nø vdu we tong kèní vtoshì lún lv́m dvzaq shàì.
