Shóngnøt wawe ò àng lvjøm
Vsv̀ng tiqgǿ taq yvklv́m àngpv̀n pv̀n vdóng kèní vdè kaq svng tubúm dvbang shìrawe ínìnø welòng svng shóng nøt vjø̀ng ni íe.
Shóngnøt walòng svng kø̀mzøp dø àng lvjøm svng kagǿ taqkèní gø pǿn mvlúnò, àngdè nø àngdè ò síngnøt, dvdam nøt kèní lvjøm svng pǿn shàì wewa ni íe. Tiqgǿ nvng tiqgǿ taqkèní pǿn shìwe àng lvjøm màbóng we ínìgø àng mvtú mv̀ngnø tiqlòng wani íe. Vsv̀ngrì tiqgǿ nvng tiqgǿ v̀lì we shvràrì, dvcìrì, shing mv̀rshv̀m rì vsháy nø̀ màbóng we ínìgø we shóngnøt waweò àng lvjøm svng vtoshì we dang taq nø tiq dvchá ni vbóng we íe.
Mvréza shóngnøt nø nøt yvngwe, mvrà chutā we, vdè vjú dvpvt wa mvyv̀ngwe, tiqdv́ng vsv̀ng dvpvt dvdamā we, dvsháza we bv̀nlì rì vbáwe svng àng lvjøm pǿn shìwe íe. Vdè shóngshàì we vsv̀ngrì dvpvt shvlawe vjúrì lún dvzv́r mvyǿ we nøt mvsø̀n àngpv̀n pv̀n kèní mvkok we nø mvréza shóng nøt ni íe. Shóngnøt wawe ò àngrø taq nøt yvng nøt, mvrà chutā we nøt, shèrwe nøt, dvshv́ngshì nøt mv-vl we rì kèní pv́ngshìe.
Shóngnøt walòng svng àng lvjøm àngpv̀n pv̀n vlwe ínì gø àng bø̀ng lvjøm mvdø̀ng nø mvréza tubúmā we, mvkok dvdí we ni íe. Wedø tiqgǿ nvng tiqgǿ dvhø̀ taq mvréza we tubúm dvbangā we tvrà mv-vl we ínìnø vsv̀ng tiqgǿ wawe dvgùng kèní kø̀mzøp dø cúnshì lúnlv́m tvrà mv-vl long.
Gvray shv̀nshér kàru taqgø ídv́ngte shvngbe nø Gvrayí ziwe jejú gømpaq ri wani íwe svng vtán shaq íe. Nøngmaq ò shagóng rì gø Gvray yv́ngkèní íe, Vdè èshøq bøwe rvtø̀ taq vdè nø góng sél tuqráshà wewa íe. Tiqdv́ng vsv̀ngrì ò mvréza shóngnøt màbá shaq pàgø wá mvlúnì.
Vsvk lvpat rì téráì we lvpat tvrà taqgø záyv̀ng àngpv̀npv̀n, shìwvt àngpv̀npv̀n rì dvhø̀ tiqdv́ng vsv̀ngí dvbangā we mvvl long nìnø lvpat dvtut cúnshì lúnlv́m yvkwe tvrà rì àngboq boq vhǿm sháìe. Mvkok dvdí we shóngnøt vdòng taq nøngmaqò lvpat rì cúnshì ráshà we rvtø̀ rì gvzàni vlwe íe. Lvpat tvrà wawe taq làngdø̀m àngni høqshaq tiqdv́ng vsv̀ngrì ò dvbangā we tvrà kèní lvpat rì dvtøm shàì we íe.
Wervtnø̀ vdè í wálún we rvtø̀, àng dvjà vdòng taq shvla we bv̀nlì rì svng wá dvzaq shàì, tiqdv́ng vsv̀ngkaq tubúm dvzaq shàì. Mvréza shóngnøt wawe lòng nø nøngmaq dvpvt làngdø̀m rvtø̀ høqshaq vtoshì lúnì we íe.
Lvpat taq rvtø̀ àngni rì nø gvzà ni tø̀we ínø̀ tiqlvng cè taq bevm we íe. Àngni kèní àng shvlá, àng shvlá kèní àngnǿng, àngnøng kèní àngnǿngrì udø dø vlevm we ínø̀ lúnì we rvtø̀ cètaq mvréza shóngnøt rì vzí kelv́m shvla we íe. Pv̀n vrv̀m nø àng shvdún shvdang ku vl longe, rvtø̀ gø àng rvtø̀ kuni vlevme.
“Pø̀, Gv̀msùngí wvn shì shvla we dvrè rì shvngbe ègùr bǿò wekvt vdè taq kadv́ngte vdá mvgàme walòng svng yv́nglún shì longe”. Tiqkvt kvt lvpat tvrà taq vchvk vtang wawe nø pø̀, gv̀msùng, mònggv̀n dvrè rì, bø̀ngshv̀n we, jór nònggùn íe wa lv́nsháìe. Jø̀ng jǿng taq vdá mvgv̀me wawe zaqshøp nø vdè taqkèní zí lún we tvrà, bv̀nlì íe. Mvréza shóngnøt walòng ni íe. Pø̀, gv̀msùní tvle mvlún shìwe nø yalòng shóngnøt ni íe.
