Svrabín koqkv́mpè Francis taqkèní Myanmar móngdàn dvpvt vjúrøt dvbangā we
Svrabín koqkv́mpè Francis taqkèní Myanmar móngdàn vdòng bø̀nwe móng lvmang, mvjàn rì shvngbe zø̀mlv́m tvrà dvpvt vhøm nø mvngushì we, àng mvtú lánø zø̀m lúnlv́m dvpvt vjúrøt dvbangā we
Pope Francis nø vleá:mì lvbán àngwà Angelus vjúrøt tvyø taq móngdàn mòngzø̀l lv́m tvrà dvpvt vhøm nø mvtú lá dvzaq shìlv́m nvng shvngbe vzø̀m we tvrà nø laqni vchvkwe dang dvtú bǿà we íe. We vjúrøt lvmang tvyø taq Móngdàn vdòng mvhøt lv́m shìwvt rì vhǿmò we móngzøngcèrì dvpvt dvdam nø vjúrøtā lv́m dvkv́m bǿà wegø íe.
Myanmar móngdàn vdòng 1920 nǿng taq móng lvmang nvng singnø̀ zùngmàng rì vjángshì we yv́ngkèní pv́ngshì nø vzø̀ngwe tvrà nø yanǿng vdòng (100) nǿng gøm bǿì wegø íe. Wedø íwe àng mvdò rì cheshì we taqkèní cv̀mré rì, vsvk tébǿì we shaqré rì, za vsv̀ng rì nvng mvjàn yølshì taqsórí dvshá mvhoq vhǿmò vsv̀ngrì dvpvt dvsháza lv́m wàì.
Wervt døngmvn we àng mvtú tiqlòng svng lálún lv́m wawe vhømnø dvmàn lv́m, àng mvtú lánø̀ cømsaq mòngzø̀l lv́m tvrà svng vrang lv́m dvtú nø røt nímshì we íe wae.
Vdèò Myanmar móngdàn dvpvt wa mvtaq Ukraine, Palestine, Israel, Lebanon nvng Sudan móngdàn rì dvpvt gø mòng dàn vdòng vrv́m vránø̀ mòngzø̀l we tvrà lúnlv́m Svrabín koqkv́mpè Francis taqkèní zaqzaq vjúrøt dvbangā we svng Vatican shvngkà dvp kèní vrìngvtnà we íe.
