(33) Nár, November 24
Shvngbe mvdvm Gvray mongzøl lòng laqtuq daq.
Ya lvban nø àngwa Nár (33) lvban wà lvban svng gòng bø’shà.
Daniela 12:1-3
Hebru 10:11-14,18
Marko 13:24-32
Yesu tv́n tiq kvt di daq we
24 “Dvshà mvhøt welòng mèpvng nv̀m nø yø̀myø̀m døv̄me; shvlá gø mvgáv̄m; j 25 Kurniprì gø muqlàng kèní vja daqe. Muqlàng rāmò jórnònggùn rì gø vnanshì longe.
26 Wekvt Vsvng Angcè pè nø jórnònggùn vtv̄ng ó ngørdvgùng nvngnvng, rvmøt zúnshì nø lashì daq we svng angmaqí yv̀ng lú:ngòe. l 27 Wekvt A:ngí Ang dvzv́r rì dvzv́r daqò nø, rvgaq yamvtú kèní ku mvtú høq rvgaq vbì górtong kèní ni, Gvrayí rvhiqshaq rì svng dvkø̀ma:tnòe,” a:lòe.
Vpø’ íwe pèmè vnvmchvngmaq, Dèni tálúnì we Gvray dvbùshang mongkà taq, vsvng angcepè dì lvm dang , lvngdøm àngni (mø-í ni) mònggvn vle lvm àngni svng shønò we móngkà íe. Shvrē lvm dø í rì, vrøl vcatlvm dø í rì, bunglvm dang svng; Nvmgø yø’myø’m døvmè, shvlá gø mvgávm, kurniprì gø Muqlang kèní vja daqè, wànø shvre lvm dø í rì shønòe.
Íni gø Vkangpè Yesuí mvdøng gvl nø shø’n mvyø’ we taq, vkvt bøn we shvre v-nv’nlvm dø í rì mø-í , àngshvr pàngshìlvm lvpatnò tvrà dang le íe.
Maipang shø’ng svng dvtú nø shø’n lòng nø, rvgaqtømò rvtø lvngcha taq cvn weí bøn we mvbøn rì svng yvng taqsórí shá lúnlvm dvpvt íē.
Àngò mònggvn lvpat bēvm mèpvng nø mònggvnò lvpat mvshøl, vsvngrìo lvpat mvshøl, àngshvr bøn bunglvm dang svng Vkangpè Yesuí Dvzvrì kaq pàgø mvbøn we vzàng dvgø’shì lúnlvm rvt dvkv’m yangà dang íē.
Yadang nø jø’ngjøng ni mònggvn lvpat mvshøl taq Gvray gvsangò lvpat wál àngshvr tiqlòng pvngshì lòng í bø’ì. Muqlang kèní Gvray gvsang dì lúngì dang svng nøngmaqí shøngrvn yv’nglún lvm dvpvt yorè, Í nigø, wè yv’ngkèní shvra vrá lùshì, yílshì lòng nø , Gvray gvsang kaq vrá ngvng lòng ínø, Muqlang móngdàn tøngnu yv’ng rùng a:mì lòng íe.
Vkangpè Yesu vrá dì lvm dang Kà shvdiq zíshì we íni gø, àng rvtø nø mà mvsat yangò. Vsvng angcepè jór dvgùng gùngshang weí vrá tiqkvt dì daq kvt, Gvray gvsangò móngdàn svng vrvng lú:ngò we íe. Íni gø Kagø’ í gø mvshaì. Nøngmaq gvzà shvre lvm nø mà-vl.
Lvngdøm rvtø wàwe nø vjú zílún we mà-vl. Gvray àng tiqpè í wa sháò we írvt Kagø’ í gø mvsháò lòng svng nøngmaq kaq shá dvzvr rìe. Yalòng svng dvdvm mì nø , nøngmaq tvlú dvgø’shàìe mà? Mø-í nì, tiqni rvtø taq bé sháò we nøngmaqò lvpat dvpvt shvla we jèjú bvnlì tiqlòng lòng svng wá dvgø:m lún bø’shà mà? Dvdvm nø nònggùn lùshìlvm wàì.
Vpø’ íwe pèmè vnvmchvngmaq, Lvngdøm àngni svng mv-shá i dø tiqdvchá vkvt nøngmaq v-li we lvpat svng vpø’ shvring ínø dvbù nøntni cúnshàì nø Vkangpè Yesu vrá dì daq long svng vlømshàì. Nøngmaqò mvsøn nvrøm taq Vkangpè Yesu kaq gvli nø vsvng angcepè tuqdaq we, Kà shvdiq zíshì we, dvciq lvpat gønshaq vl móngdàn yv’ng tuqlunlvm rvt vjúrøt shài taqsórí shvla we jèjú bvnlìrì, tvmu bvnlìrì luqluq wá lúnlvm, tasvng tale vpø’ shvring taqsórí shvkse wáshì laqlúni. Shóngnønt dvtan laqlúni wvng dvshat nø nònggùn zí mvyøngè.
Shvngbe svng Pàmvrà.
#homily
