“Tiq ni taq shvngøt kvt nàlévtnøng nø shvngøt kvt vwángshì ra nø namaq svng, ngà nøt vwángshø̀nge, wa ra ni nø, ang svng èchutnanø̀ng,” a:lòe.”
Luka 17:1-6
“Mvrà chutā mvwá shìwe jàng laqyà nø vsv̀ng tiqgǿ vrv̀m taq wedøni vl longwe íe. Welòng nø pvlàcè kù:ngà vnǿn we svng dvtvnā wegø íe.”
Vpǿì we pè, mè, vnvm, vchvng maq nøngmaq bashà rì nø vlé shì sháì we vsv̀ngrì wani íshàe. Mvrà chutá we tvrà svng shóngshàì we ínìgø tiqgǿ nvng tiqgǿ dvhø̀ taqø mvrà chutāwe tvrà mvwá shàì we svng shvdǿm we íe. Tiqkvt kvt vdèí nàlé bǿò we mvrà rì dvpvt èchut nangà wanø̀ røtním shì sháìe. Ínìgø tiqdv́ng vsv̀ng kaqnø mvrà chutā mvwá shàì we laqyà rì v̀lì we svng yv́nglún shìwe íe.
Mvrà chutā we bv̀nlì wawe nø Gvray nvng singwe tvrà íwervt bashà tiqgǿò kù:ngà taqkèní wanø wá dvzaqshì we taqkèní nø mvbǿn daqwe bv̀nlì tiqlòng gø ie. Kàngpè Yesu nø nøngmaq bashà rì, àng shóngshì we tvrà nvng vsháyvm we tvrà rì svng èwà bǿò we ínìgø nøt vwáng shàì nø àngyv́ng svng ním shàì we ínìnø kadvgvp ínìgø mvrà èchutā ìwe íe. ( Luka 15:11-31) taq nōngtøm pè vmvng we dang vrá àngpè yv́ng svng loráì wekvt shaq shaq wa vtoò we dang vru ráà we gø íe.
Kàngpè Gvray ínø nøngmaq kaqsvng nøt vwáng shàì nø vtáng ráì wekvt kadvgvp gø mvrà èchutāì pè íe. Jø̀ngjǿng taqø àngí chutā mvlúnò we mvrà wawe gø mv-vl. Yesu Kristu àngsvng shvt yv̀ngà we vsv̀ngrì kaq høqshaq àngí mvrà chutā ráà we íe. (Luka 23:34) taq “Wekvt Yesuí, vpèá, àngmaq mvrà èchutnāò, pàwálv́m wanìnø àngmaqí wàò long svng àngmaqí mvsháò, wae”. Wanø vtàn ráà we íe. Nøngmaq Yesu àng mèpvng cv̀nì we shvngbe svng gø Kàngpè Yesu àng døni mvrà chutā sháì vsvngrì bǿnlún lv́m àng shóngshì we íe.
Yesu Kristu taqkèní nøngmaq dvhø̀ tiqgǿ nvng tiqgǿ mvrà chutā kéràwe dang chvpdvp ni dvtan nø shvdǿm ráshà we íe. Nøngmaq tiqgǿ vrv̀m gø Kàngpè Yesuí mvrà chutā we døni nøngmaq tiqgǿ nvng tiqgǿ taqgø mvrà chutā keshálv́m dvzaq shàì.
