Làngré lvpat taq shá ràwe mvtú kà (5) kà
Shòlaq lvpat wawe mvril svng tuqvm wekvt màbóng lvpat tvrà, dvjà àngpv̀n pv̀n lvpat zaqlè tvrà svng ngang ràwe shòlaqré rì dvpat paqzí kà (5) svng gø síngshá nø dvtøp shì, cv́n dvgøm shìlv́m, vshøp shì shvla we íe. Wekà rì nø
1. Lvpat tvnù manggá ngv̀ng ngv̀ng gvlshì vsvng tiqgǿ taq kadvgvp gø dvpè we mvwá shì
Vsv̀ng tiqgǿ svng èyv̀ngvt lvpat tvnù manggá gvlshì vsvng nvng mvgvl shì vsvng walòng svng yùl yùlcè yv́ngshá lv́m wawe taq lvpat tvnù manggá wawe mv-vl vsv̀ng tiqgǿ nø bv̀nlì tiqpv̀n pv̀n dèzv́r lú:ngò wekvt shò shò wa wáshì lv́m tvle àngdang dang kèní dvpè we, mvrà la we, cip lawe àngpv̀n pv̀n kèní yv́ngshì longe. Udø írvt, Yadø írvt wawe ciplanø dvpè we kàrì yv̀ngmàdvt shǿnsháò vsv̀ng íe.
Lvpat tvnù manggá ngv̀ng ngv̀ng gvlshì vsv̀ng tiqgǿ wawe nø kadvgvp gø, kadø íwe dvjà taq ínìgø vtiqshì we, dvpèwe, ciplawe mv-vl bv̀nlì døngjá mvdàm kù:ngà zángshì nø wá dvzaqshì longe. Jórlún lv́m tvrà svng lúnhøq dvzaqshì longe.
Vsvng tiqgǿ ò lvpat tvrà, Bv̀nlì wàng tvrà taq kadvgvp gø vtiqshú, dvpé shú mèwáshì ni, wedø dang vrv̀m taq vtiqwe, dvpè we vsv̀ng nø dál vsv̀ng, lvgùn vsv̀ng rìò laqyà tiqlong ni íe.
2. Lvpat tvnù Manggá ngv̀ng ngv̀ng gvlshì vsv̀ng nø kagǿ nvng gø dvløt we mvwáshì
Kagǿ nø lvpat tvnù manggá gvlshì vsv̀ng íwe, mǿí we svng rvcv́ng shálv́m wawe taq Lvpat tvnù mvnggá ngv̀ng ngv̀ng gvlshì vsv̀ng tiqgǿ taq kagǿ nvng gø dvløt we laqyà, nøt mvsø̀n mv-vl, vdè góng vdè wa dvløt nø dvtøp shì we íe. Ngà vdè nø cv́:ni nvng dèni kadø vsháy ló:ngà wawe nøt mvsø̀n kèní vdè góng vdèwa dvløt dvtøp shì longe.
Ínìgø Lvpat manggá wawe tøp tøp wa mv-vl vsv̀ng tiqgǿ nø tiqdv́ng vsvng kaq dvløt we, ngàí àng svng dv́ngkéràe wawe nøt mvsø̀n laqyà kèní dvløt longwe laqyà wáshìe. Vsv̀ng tiqgǿò lvpat tvrà taq tiqdv́ng vsv̀ng kaq jórlúne wawe mvdv̀m vdèò dòngnøt mvsø̀n svng vdèí øpdv́ngshì lv́m nø téwa vchvk we íe.
Tiqdv́ng vsv̀ngkaq dvløt shø̀ngjung lv́m walòng tvlè, vdè góng vdè dèniò ngà vdè lvpat nvng nvpni rvtø̀ taq ngà vdè kadø vsháy lóngà wanø̀ dvløt, dvtøp shìlòng nø mvdø̀ng íe.
3. Vdè ò dvpǿ svng vdè dvháng shìràe
Vdèò dvpǿ, vdèò ngór dvgùng vháng lv́m dvpat tiqdv́ng vsv̀ng kaq shvyǿm we vsv̀ngrì gvzà vlwe svng yv́nglúnìe. Jø̀ng jǿng taq lvpat tvnù manggá tewe vsv̀ng tiqgǿ wawe nø vsvng shvngbe svng vpǿ we laqyà gv́lshìe, wedø vsvng shvngbe kaq vpǿwe nøt gv́lshì we nø̀ vdè góng vdè svng gø dvpǿ dvhangshì we tvrà íe wanø vtoshì we íe. Lvpat tvnù manggá mvte we vsv̀ng tiqgǿ nø tiqdv́ng vsvngò dvgùng svng yv́ng mvtv̀mnø̀ shvyǿmwe laqyà wásháòe.
4. Lvpat tvnù manggá tewe vsv̀ng rì nø rvtø̀ vrv̀m cvnshì we dang kèní dvzaq shìe
Vsvng tiqgǿò lvpat wawe nø nv̀mlat àngmè puqwá kèní èshøq bøwe rvtø̀ kèní pv̀nyv̀n cv̀nshì we bv̀nlì wanø̀ cúnshì ràwe íe. Lvpat tvnù manggá tewe vsv̀ng rì nø rvtø̀ vrv̀m Cvnshì nø lvpat cúnshìe, cvnshì nø tvmø bv̀nlì taq ripwe, cvnshì we tvrà tvyø vdòng taq vsvk tenø shìni høqshaq cvnshì ràwe tvrà kèní lvpat dvtømshìvm we íe.
5. Vsvng shvngbe nvng vzø̀m vzvpwe wáshìe
Vsv̀ng shvngbe dvpat gø vdè nø rvmnvng shvlá tiqgǿ bǿnlún lv́m dvzaqshì ràe. Rv̀mnvng rv̀mchvng luqwe nø lvpat tvrà shvlá lv́m dang svng téwa gwaq dvzv́r we gø íe. Vsvng shvngbe nvng vzø̀m vzvp lúnlv́m dvpvt vdè tiqgǿ taqkèní gø vsv̀ng rì mvdàm shvlawe, mùngnø̀ shèrwe nøt mvsø̀n laqyà gvlshì lún ràwe íe. Vdè nø vsv̀ngrì mvdàm rv̀mnvng rv̀mchvng shvlá tiqgǿ ku v́l lúnwe tvrà kèní lvpat manggá tewe svng vtàn lv́m vchvk we íe.
Lvpat tvnù manggá mvtewe vsv̀ng tiqgǿ wawe nø vdè góng vdè gø vsv̀ngrì mvdàm rv̀mnvng shvlá tiqgǿ bǿnlún lv́m mvwáshì, rvmnvng rv̀mchvng shvlá rì svng gø lashì nø vzø̀mwe mvwáshì long.
Wervtnø̀ Vdè ò lvpat tvrà gø tvnù manggá wawe tewe, cv̀mwe dvtøpshì lúnlv́m dvpvt
1. Lvpat tvnù manggá ngv̀ng ngv̀ng gvlshì vsvng tiqgǿ taq kadvgvp gø dvpè we mvwá shìlv́m
2. Lvpat tvnù Manggá ngv̀ng ngv̀ng gvlshì vsv̀ng nø kagǿ nvng gø dvløt we mvwáshì, wáshì mvdaq
3. Vdè ò dvpǿ svng vdè dvháng shìràe
4. Lvpat tvnù manggá tewe vsv̀ng rì nø rvtø̀ vrv̀m cvnshì we dang kèní dvzaq shìe
5. Vsvng shvngbe nvng vzø̀m vzvpwe wáshì ràe, vsvngrì dvpat rvmnvng shvlá bǿnlún lv́m dvzaq shì ràe.
Yalòngnø Làngré lvpat taq lvpat tvnù manggá tedø gvlshì we vsv̀ng rìò nøt mvsø̀n laqyà mvtú (5) dang íe.
