” Vrá, vdè wurgang baqshi taqsórí Ngà mèpvng mvcv̀n we kagǿ ínìgø, wegǿ nø Ngà coqcv́n wá mvlúnshì”
Luka 14:25-33
Mòngkà yalòng taqkèní tálúnì we Yesu Kristu àngò dvkám kà svng coqcv́n rì, nvng nøngmaq shvngbe taqkèní dvdam shàì nø cv́n dvgøm shàì.
Nøngmaq cv̀m lvpat taq àngpè, àngmè, shølshú svra rì taqkèní shvngøt dvtú rawe rvtø̀ rì taq cv́n dvgøm ràwe mvtú rì svng kadvgvp gø dvkv́m we íe. Wedøni kàngpè Yesu taqkèní gø àngò coqcv́n rì svng shvngøt dvtú ò wekvt àngmè pvng cvn vsv̀ngrì taq v́l ràwe nøt mvsø̀n laqyà dangrì taqkèní dvtú nø dvkv́m ráà we íe.
“Ngà yv́ng di ra vsvng kagǿ ínìgø, vdè angpè angmè, ang chø̀mmè angcǿ angcèrì nvng angnv̄m angchvng rì svng gø; vrá, wemvdv̀mø vdè gø̀nshaq svng gø, shvngōshì we mø̀í kvt kèní nø, Ngà coqcv́n wá mvlúnshì” wanø̀ dvtú ráà. Kàngpè Yesu taqkèní nøngmaq kaqsvng àngpè, àngmè, àngnvm àngchvngrì svng mvshóngshì lv́m shǿn mvyǿ we mǿí. (Lk 18:20) nvpè nvmèní svng nàpǿò wanø̀ dvkv́m ráà we íe. Àngpè, àngmè, àngnvm àngchvngrì kaq shóngshì ràe ínìgø àngmaq mvdàm kàngpè gvray kaq shóngshì lv́m dang shvdǿm we íe.
(Dvrá Dvshat 6:5) Wervtnø̀ nà tiqnøt shvngbeí gø, nà dòngnøt mvsø̀n shvngbeí gø, nà nònggùn kùngà shvngbeí gø, nà Gvray Yehowa svng shóngshì ràe. Kàngpè Yesu ò coqcv́n rì svng yv̀ng lú:ngì wekvt àngmaq nø Kàngpè Gvray svng vtang kèní shóngshì we svng yv́nglún shìe.
Kàngpè Yesuí Simon Peter svng àngmèpvng cv̀nlv́m goò we rvtø̀ taq Simon Peter nø àngpè, àngò shø̀, àng shvgún rì svng gurò nø Kàngpè Yesu mèpvng cv̀nyv̀ngì. Wedø Kàngpè Yesu mèpvng cvn taqsórí làngdø̀m taq shvt vhǿmò nø gønshaq zíshì wehøqshaq cv̀n yv̀ngì we íe. Simon Peter nø àngpè, àngò shø̀ nvng àngò dvrè rì shvngbe mvdàm Kàngpè Yesu svng shóngshì we dang svkse dvtan ráà we íe. Wedøni nøngmaq gø Simon Peter døni Kàngpè Gvray kaqsvng shóngshì lúnlv́m dvzaq shì ràìe.
Bashà vsv̀ngrì shvngbe tiqgǿ vrv̀m taq yvkwe shìwvt àngpv̀npv̀n wawe nø wedøni vkǿn longe. Wedø íwe dvshà lv́m shìwvtrì nø nøngmaqò wurgáng ni íe. Kàngpè Yesu mèpvng cv̀nì we nøngmaq nø wedø íwe dvshàlv́m shìwvt rì svng wurgáng ku dvdut shàì taqsórí Kàngpè Yesu àng wurgáng zaqshì yv̀ngì we tvrà ku dvzaqshì lv́m wáshàì.
Rvgaq mvdàm v̀lìwe vsvng mvlúngka nø Kàngpè Yesu màbá we wurgáng svng zaqshì nø cúnshì wesvng yv́nglún shìe. Yesu Kristu mèpvng cv̀nì we nøngmaq shvngbe nø Gvray àng vbáwe, àngnvng tiqdø íwe wurgáng svng zaqshì lún ràìe. Kàngpè Yesu màbáwe wurgáng walòng taq rvyù rvyóng lv́m tvrà rì, yvkwe shìwvt àngpv̀npv̀n rì, nøt cv̀m nøt vtang lv́m tvrà rì nø Kàngpè Yesu vdòng vlǿmshì we, vléshì bø we mvrà rì dvpvt wanø̀ nøt cunshì we ku mǿí nø lvpat cúnshì we tvrà svng shǿn mvyǿ we íe. Kàngpè Yesu nvng tiqdø íwe wurgáng wawe nø nøngmaqí vhǿmì we shìwvt àngpv̀npv̀n rì shvngbe svng àngwur svng apshì nø àngnvng tiqdø cúnshì we lvpat tvrà íe.
Kàshvbóng yanila ò vdè Myanmar mónm gdàn vdòng taq bø̀nbungwe móng lvmang dvjà rì rvt dvshàlv́m àngdang dang rì vhǿmì we rvtø̀ Kàngpè àng taq vlǿmshàì weí àngwur taq shvngbe apshàì nø kùngà rì lushì ràwe íe. Yesu Kristu rvgaq mvdàm svng dìráì we rvtø̀ àng svng dvbǿm lv́m shvrà tiq shvrà cègø mv-v́lāò we rvt nì nà kùng taq dvbǿm yv̀ngà. Herod koqkv́mí vrá shvt lv́m vjønò wervt Yesu, Mari nvng Yoseph àngmaq nø Egypt móng svng vtshì rà yv̀ngì we íe.
Nøngmaq ò wurgáng íwe yvklv́m shìwvt àngpv̀npv̀n rì, mvhøt lv́m tvrà rì svng Kàngpè Yesu nvng tiqdø wáshàì we kèní vle lúnlv́m dvpvt àngmèpvng cv̀nlúnwe vsv̀ngrì bǿn lúnlv́m dvzaq shài. Gǿ vrv̀mí gø̀nshaq shémo vtoshì laqlúnì.
