St. Martin De Porres Confessor (1569-1639)
Sv̀ngpv̀n vtoq vtip we tvrà nvng vdu vbóngwe dvrá tvrà ò vlǿmrà svra tiqgǿ wanø̀ bø̀ngshvng yv̀ngì we St. Martin De Porres nø AD 1569 nøng Peru móngdàn, Liva myuqø shøq yv̀ngà. Spain dvcì shingmùng vsv̀ng tiqgǿ íwe àngpè nø Martin shøqbǿà mèpvng àngmè Negvrú shingnaq dvcì gǿní svng gur ráà. Àngnø dvshá mvré íwe døngku kèní téráì we tiqgǿ íwervt wedø dvshà vsv̀ngrì kaq vtang kèní shóngnøt gv́lshì we tiqgǿ gø íe.
Àng vsvk 12 nǿng taqni St. Martin nø cì svrawon tiqgǿ íráì nø àngò shvlá zìbè rì taqkèní cì róng rungwe vsv̀ngrì, tung rungwe vsv̀ngrì kaq tubúm dvzaqshì wervt vsv̀ngrì ò vlǿm shìwe shóngnøt rì vtoshì lún ráà we gø íe.
Àng vsvk 15 nǿng taq Lima myuq taq vlwe Dominican shvrúngshú mvdò svng gòng nø dvsháza bv̀nlì, Gvray dvkv́m kà cv́n dvgømwe, cipshìwe wawe laqyà rì taq kàciq gv́lshì taqsórí 9 nǿng døp v̀l yv̀ngì. Àngò vsv̀ngrì mvdàm gv́lshìwe shvla we laqyà nøt mvsø̀n rì dvsháza bv̀nlì rì nvng cømsaq mòngzø̀l we bv̀nlì rì rvt àngnø shv̀nshér we vsv̀ng tiqgǿ wanø bø̀ngshvng yv̀ngì we íe.
St. Martin De Porres àngí vjúrøtā we tvrà rì kèní za vsv̀ngrì, zønli àngpv̀npv̀n rì svng gø shvzǿmā lúnwe tiqgǿ gø íe. St. Martin nø vsv̀ngrì ò dòngnøt mvsø̀n rì svng yv́nglún, síngsháā lúnwe tiqgǿ gø íe. Àngnø Gvray ò gálòng nvng tiqdø vlwe tvrà svng àngnvng tiqdø vlwe shvrúngshú rì taqkèní yv́nglúnò we íe.
St. Martin nø kv́mnøt tvrà taq chá vle dvzaqshì we tiqgǿ gø íwe taq Dominican shvrúngshú mvdò pvlàcè dang taq àngò lvpat tiqgóng zíshì we høqshaq apnúng shìyv̀ngì we íe. Àngnø dvcì pv̀nrì dvhø̀ taq màrvwingwe shóngnøt kèní shvngbe svng rìn vrá vtoq vtip lúnwe rvt Spain, Negvrú nvng Idian dvcì rì taqkèní àngò jejú svng vtang kèní dvgùng shvring we vhǿm ráà we íe.
St. Martin De Porres àngtaqkèní v́lrà màdá dvrvtcè rì nvng dvshá mvré íwe dvshà vsv̀ngrì 160 gǿ svng gø vcùng nø mvkok yv̀ngà. Àngí dvsháza alu rì svng mvgàmré rì yv́ngkèní gún vshø:pmò dv́:ngí tiq lvbán taq Rupee 26000 alu rì svng vwv́nā we wáā yv̀ngà we íe.
St. Martin De Porres àng nø vsvk 70 nǿng taq lvpat béyv̀:ngì nø Mali myuq taq vlwe vsvngrì shvngbe nøt yòl we mvtaq Peru koqkv́m pè nvng Svrado 2 gø rì taqkèní àngò kø̀ svng zaqò nø kǿm yv̀ngà we íe. Àng shì bǿì mèpvng 25 nǿng naq bǿì we høqshaq àngò shagóng vnv̀ng lòng nø bøp we mv-vl àngwà døni shvlá cè vlda we svng yv̀ng yv̀:ngà we svng gø shálún shìe.
