All Saints’ Day
Kristu vdòng vpǿì we Pèmè, vnvm vchvng maq dèni nø shv̀nshér vsv̀ngrì ò bóy àngni wanø mvsat shìwe lvbán svng tuqráshà we íe. Shv̀nshér vsv̀ngrì wawe taq muqlàng móngdàn svng tuqbǿì we vsv̀ngrì, àngmaqò pvlàcè rì svng shǿn mvyǿ we íe. We shv̀nshér we vsv̀ngrì taq nøngmaqí sháì we vsv̀ngrì gø vbáwe dø tiqdvchá, nøngmaqí mvsháì we vsv̀ngrì gø vbá longe.
Àngmaq shvngbe nø mònggv̀n rvgaq mvdàm cúnshì yv̀ngì we vsv̀ngrì wani íe, wervtnø̀ nøngmaq vsvng wawe lvpat svng tuqráshà wenø shv̀nshér we vsv̀ngrì, shv̀nshér we pvlàcè rì bǿnlún lv́m íwe svng síngshálv́m dèni wáshì we shv̀nshér vsv̀ngrì ò bóy àngni taqkèní shvdǿmā we íe.
Nà, ngà vdè nø ya lvpat kèní vle bǿì mèpvng shv̀nshér we vsv̀ngrì bø̀nlv́m shóngshàìe má? Shv̀nshér vsvngrì bø̀nlv́mrvt dvzaq shàì we ímá? Dèni tálún lv́m Mati 5:1-12 taq shv̀nshér we vsv̀ng rì bǿnlún lv́m dvpat Yesu Kristuí dvkám ráà we “Dvgǿng shvmán kà” 8 kà íe.
Werì nø 1. Pvlàcèdang mvshámhoq dvshá dǿmshìrì, 2. Rvyù rvyúng vsv̀ngrì, 3. Nøt cipshì vsv̀ngrì, 4. Døngman lòng svng mvrøt nø bál vsvngrì, 5. Vsv̀ng kaq dvsháza sháò vsv̀ngrì, 6. Nøt mv́ngshèr vsv̀ngrì, 7. Vsvng kaq shvrv́m shvráò vsvngrì nvng 8. Døngman tvrà rvtnø̀ dvki vrèlv́m vhǿ:mò vsvngrì, ngà dvpvt rvt vsa:ngí namaq svng shèyǿmnøng nø dvki nàrènøng taqsórí, namaq dang mvdìng we kà mvġm àngpv̀npv̀n shø̀n ra we nàhǿmnøng vsvngrì wanø̀ dvkám ráà wegø íe.
Angmaq shvngbe nø muqlàng móngdàn svng gónglúnlv́m vsv̀ngrì íe. Vránø àngmaq shvngbe nø shv̀nshér we vsv̀ngrì bø̀n longwe gø íe. Wedø shv̀nshér we vsvngrì taq vbálún lv́m wawe nø nøngmaq bashàrì ò tvnù manggá tiqlòng gø íe.
Interview tiqlòng taq vsv̀ng lvpat taq rvyù rvyúng we tvrà, kratcǿm we tvrà, nøt tǿnshì lv́m tvrà (3) lòng wawe nø kapà rì íe má? wanø̀ Svra tiqgǿ svng røtnòe. Àngtaqkèní vrá vtànò wenø vsv̀ng lvpat taq rvyù rvyúng lv́m tvrà, kratcǿm we tvrà nvng nøt tǿnshì lv́m tvrà vjǿng wawe nø shv̀nshér we vsv̀ngrì mvbø̀n lú:ngì we tvrà ni íe wanø̀ vtàn ráà we vle.
Nøngmaq tiqgǿ vrv̀m nø shv̀nshér we vsv̀ngrì bǿnlún lv́m tvrà àngpv̀n pv̀n, àngdangdang kèní Kàngpè Yesuí shèngøt ráshà wegø íe. Wewa mvtaq nøngmaq kaqsvng tubúm dvbangā lv́m dvpvt shv̀nshér vsv̀ngrì gø nøngmaq dvpvt èzíā ráshà we íe. Nøngmaq lvpat tvrà taq kratcǿm we tvrà, yaklv́m shìwvt àngpv̀npv̀n vkǿn rawe rvtø̀ taq nònggùn kù:ngà lushì shvla we shv̀shér vsv̀ngrì gvzà vlwe íe.
Shv̀nshér we vsv̀ngrì wawe svng 2 dang kèní yv́nglún shìe 1. shv̀nshér we vsv̀ngrì nø Gvray mòngkà svng gvzà kv́mwe, cv́n dvgøm dvzaqshì we vsv̀ngrì íe. Gvray nvng àngò mòngkà walòng svng Gvray àngí ezí bǿshàwe té vtang we gømpaq tiqlòng gø íe. Welòng gømpaq kèní lvpat cúnshì we vsvng nø shv̀nshér vsv̀ng bø̀nlv́m nv̀mlat mvpv́ng gø íe.
We tvrà svng síngsháò we shv̀nshér vsv̀ngrì nø Gvray àngmòngkà kèní lvpat zíshì høqshaq svkse wáshì nø muqlàng móngdàn bv́ngkà svng gónglún we vsv̀ngrì íe. Nøngmaq tiqgǿ vrv̀mí gø Gvray àngmòngkà svng mvngushì lv́m vko vkángrì vtoshì lúnì we íe.
2. Yesu Kristu ò lvpat mvshǿl svng èshø̀n lú:ngò dvgvp wurgáng tvrà svng vná mvdaq longwe dø shv̀nshér vsv̀ngrì ò lvpat mvshǿl wawe taqgø àngmaqí wàráà we bv̀nlì, nøt mvsø̀n, laqyà rì vbá ràlonge. Pàwálv́m wani àngmaq shvngbe gø Yesu Kristu ò wurgáng tvrà taqkèní cúnshì ráì we vsv̀ng rì írvt íe. Yesu ò wurgáng tvrà nø àngmaq svng shv̀shér vsv̀ng bǿn dvzv́r we írvt àngmaq nø we tvrà svng shóngshì we vsv̀ng rì íe. Àngmaqí ríò we gándvng svng shìwvt rì wanø cunshì we mv-vl, wurgáng tvrà nø àngmaq ò shv̀shér we tvrà wanø shóngshì weí nú:ngāwe tvrà ni íe.
Wervtnø̀ shv̀nshér we vsv̀ngrì àngmaq nø shìni høqshaq Yesu Kristu ò wurgáng tvrà, Gvray mòngkà vdòng taq cv́n dvgøm nø v̀l ráì we vsv̀ng rì íe. Wervt nøngmaq tiqgǿ vrv̀m gø Yesu Kristu ò wurgáng tvrà taq tàngdáng rip lúnlv́m dvzaq shì ràwe nvng àngmaq ò laqyà mvshǿl rì kèní cvnshì lv́m shvdǿm wegø íe.
Nøngmaq shvngbe nø shvnshér we vsv̀ngrì taq vbá lúnlv́m dvzaq dvkángshàì wedø tiqdvchá Gvrayí ègo bǿshàwe nøngmaq nø vdèò tiqlvpat shvngbe yvklv́m àngpv̀npv̀n vhǿm lú:ngì we ínìgø àng jejú nø nøngmaq dvpat luqpø̀n we írvt “Dvgǿng shvmán kà” 8 kà kèní nøngmaq svng tvrà ètóngā ráshà we íe.
