“Bv́ngkà mvchím lòng taqkèní góng lúnlv́m dèzaqshìnøng”
Luka 13:22-30
Vpǿì we pè, mè, vnvm vchvng maq Cv̀m bv́ngkà wawe nø Yesu Kristu àngtaq kèní ni íwe svng kàshvbóng kèní dvshvt we íe. Dèni tálúnì we mòngkà taq Yesu kristu nø nøngmaq svng cv̀m bv́ngkà ku góng rà we tvrà kèní ègoì we íe. Kàngpè Yesuí shvngøt dvtú we tvrà svng cv́n dvgøm we vsv̀ng nø “bv́ngkà mvchím lòng taqkèní góng lúnlv́m dvzaq shì vsvng ni íe.
Dèni vbat ò vsv̀ngrì nø kapà èwàò we ínìgø dang vrv̀m, bv̀nlì vrv̀m mvdàm wvt wvt bǿn daqwe lvwvn we tvrà yùl we tvrà svng wa cv̀n we yv́nglún shìe. Nøt mvyvngwe, àngdang dang kèní dvpè we nvng vdèò mvrà rì svng māshì we layà rì kèní cúnshàì we íe. Kà shvbóng Internet kèní bv̀nlì tiqpv̀n pv̀n èwàò we rvtø̀ line vja we, màshvla we rvtø welòng svng mvrà shvri nø shv̀mná mvgø̀r we, vsè we wásháìe.
Vzàng kaq Rvmá tvmø bv̀nlì wàngrì taq ngànshø̀, nv:ngwàrì lá:ngì nø washàìe íe. Dèni vbat svng tuqráshà wekvt nìnà rì tvle téwa lvwan we jak rì svng lángì nø̀ wàráshà. Yadø lvpat zìdang taq tiqni mvdàm tiqni vhángmvn shìnø lvwan ráì wenø vsv̀ng lvpat taq shvla we dvjà tiqlòng íe. Tiqtong kèní èyv̀ngvt nò dvgvp vrá wetvrà nø vsv̀ng rì nøt mvyvngwe, yùl we tvrà svng cv̀n ráì walòng svng gø yv́ngshìe.
Yadang shvngbe svng dètøpvtnò dvgvp vsv̀ng shvngbe nø gwaqwe bv́ngkà, yùlwe tvrà svng wa nøt vyuq nø̀ cv̀n we dang yv́nglún shìwe íe. Kàngpè Yesu àngí nøngmaq bashàrì nø yùlwe tvrà, gwaqwe bv́ngkà kèní wa dìlv́m shóngshàì we svng àngí vsháshaq íwervt àng vdè taqkèní mvchím we bv́ngkà kèní dinø chutcháng we tvrà svng shèngøt ráshà we íe.
Àng vdè shìlv́m wurgáng svng zaqshì nø gønshaq dvbǿmshì we nvng shìlòng kèní zunráì wervt nøngmaq bashà rìsvng chutchángwe tvrà svng ètóngā ráshà we íe. Nøngmaq tiqgǿ vrv̀m taqgø Yesu Kristu àng vdèò wurgáng zaqshì wedø lvpat tvrà taq mvchím we bv́ngkà ku gònglv́m tvrà taq dvzaq shàì.
Mvchímwe bv́ngkà wawe nø mònggv̀n laqyà shvrúng nøt rì svng tønshì lúnwe nvng Kàngpè Yesuí nøngmaq svng cv́n dvgøm dvzv́r mvyǿ we tvrà rì svng cv́n dvgøm dvzaq shìwe tvrà íe. Yesu Kristuí nøngmaq shvngbe svng Gvray kaq kv́m vlǿm shìwe , dvsháza shóngnøt vshøpwe, mvrà chutā kewe vsvngrì ílv́m bǿn dvzv́r mvyø we íe. Yesu Kristu àngí dètú ráshà we “mvchímwe bv́ngkà lòng taqkèní góng lúnlv́m” dvzaq shàì.
