Yoshuya svng dvká:mò we
1Yehowa Ang dvzømshúpè Moshi shìá:mì mèpvng, Moshi svng dvbv̄ngshú Nun angcè pè Yoshuya kaq Yehowaí yadø a:lòe. a 2 “Ngà dvzø̄mshú pè Moshi nø shìá:mì rvt, akvt nà nvng bashà yarì shvngbe nø, Ngàí Israel cèrì svng zǿngò móng svng gònglv́m dvpvt Yordan tìwàng èléshìv́mnøng. b
3 Moshi svng Ngàí dv́nāng yv̀ngà dø tiqdvchá, namaq hí nàzv́lshiv́mnø̀ng rvgaq í dv́ngte nø Ngàí zílv́m íe. c 4 Namaq móng nø rvgaq mvgung nvng Lebanon shigùng yalòng kèní Yufrat Rvmè høq, Hiti vsvngrì móng shvngbe nvng nv̀mløp lap nø Rvgaq Rvwè Nvmukdvra høq í longe. d
5 Nà ècúnshi we angni í dv́ngte taq nà svng vtùlv́m nà mv́rdv̀ng taq rip ngu:tnò vsvng tiq gǿ gø màvl long. Ngà nø Moshi nvng tiqdø v̀l yv̀ngà døni nà nvng gø v̀llv́m íe. Ngàí nà svng kadvgvp gø mvgur, nà svng mvlàng rāng. e
6 Nònggùn dèkv́ngshi nø nvrø̀m dètéshi: pàwá lv́m wani angmaq svng zílv́m angkop angkàng maq svng Ngà dvgv́mshø̀ng yv̀ngà móng nø angmaq angkàng wáshìlv́m, bashà yarì svng shø̄llv́m pè nø nà èíe. 7 Wervt nònggùn dèkv́ngshi nø nvrø̀m dètéshi. Ngà dvzømshúpè Moshií nà svng dèkv́m yà:ngì we dvrá shvngbe shvláwa cv́n dèdø̄:ngò.
Nà kayv́ng èdivm nìgø yūlkélv́m dvpvt, dvrá yalòng kèní vgwé vbàng svng mèposhìni. f 8 Dvrá kàru yabok taqò kàrì nø nà nònggøp kèní mèrv́lni. Kàru webok taq vrū we dvrá shvngbe nàí cv́n dvdø̄nglv́m dvpvt, vyáng yaqdø̀ng dvrákà werì svng nàí dvdv̄m nø dvmv́n ràe.
Wekvt nà nø nàháng nàlún nø jòr we èlún lú:ngòe. g 9 Nà nø nònggùn dèkv́ngshi, nvrø̀m dètéshi; mèsèreni, nøt mècv̀mni. Pàwálv́m wani nà kayv́ng èdi nìgø, Gvray Yehowa nø nà nvng tiqdø vl longe, wv̄ng Ngàí dvkv́m bǿngà we mø̀í ma?” a:lòe.
