“Nàmaqí àng tuq daqe mèlv́nnøng rvtø̀ taq vsv̀ng àngcè pè nø di daqe”
Luka 12:39-48
Vsvng tiqgǿ ò lvpat svng kadángte vl longe walòng svng kadø gø dvk mvlúnshì. Dèni tálúnì we Gvray dvbùshvng mòngkà taq nøngmaqí kadø gø dvdvm mvrǿnì we, dvk mvlúnshì we vsvk lvpat tvrà svng shvdǿm we íe. Mònggv̀n rvgaq mvdàmø cúnshàì we nøngmaq lvpat rì svng vdè tiqgǿ ò tiqlvpat dvpat cè vjú rvt wa cúnshì lv́m mǿí nø vsv̀ng shvngbe dvpvt vjú vlwe lvpat tvrà taq cúnshì lúnlv́m shvdǿmā we íe.
Nøngmaqò zitnøt paqzí rì, rvtø̀ rì, zaqshøp rì svng kadøwa lángnø pvrvn lv́m ímá? Vsvng lvpat wawe nø shvla we dang taq wa rip we tvrà mǿí nìgø vdè èrip we tvrà svng nø shvla we tvrà ku kadøwa shvnvp shìlv́m wawe dang svng dvtøp shì ràwe íe. Ni vrv̀mò cúnshàì we lvpat tvrà taq “T” (3) chv̀ng svng dvdam shàì.
1. Time (rvtø̀)
2. Talents wawe (kù:ngà)
3. Treasure wawe (pø̀) rì íe.
Kadø íwe shvrà taq èvl we ínì gø Gvray àng dvgùng svng shvring we taqkèní apnúng shìlv́m wawe lvpat tvrà taq vdè yv́ng kapà vle, rvtø̀ má? paqzí, kù:ngà Talents rì má? mǿí ni pø̀ zaqshøp rì vlwe íemá? Vdè taqkèní rvtø̀ zí èlúnò we ínì nø nà taqkèní rvtø̀ zílún we zìdang kèní Gvray àng bv̀nlì tvrà taq cv̀n lv́m dvkáng shàì. Paqzí, kù:ngà Talents rì vlwe ínì nø wedang kèní àngbv̀nlì taq dèzaq shì, Pø̀ zaqshøp èv́lā we ínìnø werì èzángò nø̀ àngbv̀nlì taq dèzaqshì.
We (3) tvrà shvngbe nà yv́ngø kø̀mzøp we ínìgø shvngbe taqkèní àngbv̀nlì taq apnúng shìnø̀ dèzaq shìwe íni té wa shvla nø vpǿ longe. Tiqlòngcè taqkèní nø àngbv̀nlì taq nøngmaq tiqgǿ vrv̀m nø dvzaq shìlv́m vdu we íe.
Vsvng lvpat tvrà wawe nø àngdongcè ínø̀ we rvtø̀ àngdongcè vdòng taq tiqgǿ nvng tiqgǿ nø shóngnøt kèní cúnshì wenø téwa shvla nø̀ vnvp we lvpat tvrà íe. Rvtø̀ wawe nø dvpǿ shvdún mvlúnshì wawe kà vlwe dø tiqdvchá ni rvtø̀ vlnø vmø we langcè taq àngbv̀nlì taq dvzaq shì nø àngnvng vzø̀m lv́m shvdǿm we íe.
“Time” wawe àngkà lvjøm svng èpǿnvt nò dvgvp,
T- Treasure rvtø̀ nø pø̀ íwe
I- Invaluable rvtø̀ nø dvpǿ tiqlòng íwe
M- Manager rvtø̀ wawe nø vdè lvpat tvrà ò bv̀nlì zǿmshú, pvrvn shú íwe
E- Escape rvtø̀ wawe nø lutshì lúnwe tvrà ò mvpv́ng àngrø mvdø̀ng íwe svng lvjøm pǿnā we íe. Wervtnø̀ rvtø̀ vrv̀m taq tvlú dvgǿ shì lúnlv́m nøngmaq shvngbe dvzaq shàì.
