Coqcv́n 70 gǿ svng dvzá:rò we
10Yadv́ng pv̀n mèpvng, Vkàngpèí dvgá dø shvngøtcé gǿ rvcà:ngò nø, Ang vdè dìlv́m wa we mvrìng vrv̀m, rvgaq vrv̀m svng Ang vzv̀ngzv̀ng angmaq svng vní gǿ vní gǿ dí dvzá:ròe. ab
2 A:ngí angmaq svng yadø a:lòe, “Dvkø̄m rà we mvzí nø jø̀ngjǿng luq we, dvkømshúrì mv̀ng nø mvluq. We rvtnø, Angkàng pèí mvzí dvkø̄mlv́m vsvng ladvzá:rò dø, mvzí Angkàng pè svng èrøtnø̀ng. c
3 Edìv́mnøng; vyitré dvhø̀ svng vyv̀ng cèrì dvzá:rò padø Ngàí namaq svng dvzá:rìe. 4 Namaq nø gv̀msùng yǿngkoq gø, dv̀nggúng gø, chøpdø̀n gø mèlv́ngnøngni; tvrà rāmø kagǿ svng gø̄ pàmvrà mèwà nøngni. d
5 Namaq kachø̀m svng góng nàduv́mnøng nìgø, ègòngv́mnø̀ng chàng, ‘Yachø̀m taq mòngzø̀l lòng laq tuq daq,’ wa nø dègǿngānøng.
6 Wechø̀m taq mòngzø̀l lòng lún vpǿ we vsvng vl nìnø, namaqí shèmána bǿshà mòngzø̀l lòng nø wechø̀m mvdv̀m tuq daqe; màvl nìnø namaq svng vwv́ng rae.
7 Wechø̀m taq èv̀lnøng nø, angmaqí kapv̀n èzívtnøng nìnø wepv̀n èv́m èaqnøng. Pàwálv́m wani bv̀nlì wa vsvng nø zìbè lún vpǿe. Kūchø̀m wáchø̀m svng mènàcílshìnø̀ngnī. e
8 Ka mvrìng taq ègòngv́mnø̀ng nìgø angmaqí natōnøng nø kapà èzívtnøng nìgø wepà èv́mnøng. f 9 Weyv́ngø zarì v̄l dv́ngte svng dèbānānøng nø, ‘Gvray móngdàn nø namaq yv́ng tvp níshì ráì,’ èv̄lnøng.
