Mari Koqkv́m mè dang shálv́m mvtú tiqdang cè
Vnvm vchvng shvngø̀mré tiqmaq taqkèní Catholic shvngø̀mré nø Mari svng noqshì we shvngø̀mré íe wanø̀ shø̀n we gø vle. Jø̀ng jǿng taqnø Catholic shvngø̀mré nø Mari kaqsvng àngmè tiqgø ku wani vpǿ nø dvgùng shvring we wani íe. Àngkaq svng Gvray shvrà taq noqngø̀m we tvrà mǿí walòng íe. Àngmè Mari nø lòngzàpè Yesu ò chutchv́ngwe tvrà taq àngmè tiqgǿ wawe shvrà kèní ripā nø dvzaq dvkángshì we dvshà mvhøt we tvrà taq tiqdø v́lā ráà we íe.
Mari taqkèní lòngzàpè ò chutchv́ng we bv̀nlì tvrà dang la vgám yv̀ngà we ínìnø dèni rvtø̀ taq rvcángcè lvpat wawe gø ni da mv-vl dvr. Muqlàng dvzv́r Gabriel taqkèní gø Mari svng svmaré rì shvngbe taq nanø dvgùng èvle wanø vtàn yv̀ngà.
Chø̀m dø̀ngku vrv̀m taq àngmè wawe nø mv̀-v́l mvdaq we tiqgø ni íe. Àngmè tiqgǿ wawe nø àngcǿ àngcè rì ò rà vchvk we tvrà vrv̀m kaq svng tubúm dvbangā nø mvkokā we tiqgø ni íe. Kàngpè Yesu wurgáng mvdàm vtaq bǿà we rvtø̀ dvzv́r Yohan svng nvmè svng èyv̀ngò wanø̀ dvkám ráà we ni kèní Mari nø bashà rì shvngbe ò àngmè tiqgǿ íá:mì.
Nøngmaq bashàrì taqkèní Mari svng dvgùng shvringì we taq àngyv́ng kèní gø mvkok dvdí we shóngnøt rì èshórā ì nø ìshøt jejú rì gø røt dèbāngì we íe.
AD 1917 Potugy móngdàn Fadima taq cv̀mré (3) gø yv́ng Mari dvtáng shì ráì wekvt we rvtø̀ nø nv̀mbat (1) mònggv̀n mvjàn bø̀nwe rvtø̀ íwe dø tiqdvchá mvjàn zø̀m lv́m dvpvt Rosary vjúrøt dvzaq shì lv́m dvtú ráà we íe. Nvmik gømla rì nvng shø̀nran rì dvtan ráà we mvtaq Svrabín koqkv́mpè John Paul (II) gø da:má mèí zá vtøp kélú:ngò we dang shønran vtàn ráà we íe.
Svrabín koqkv́mpè John Paul (II) nø wedø shø̀ngran gv̀l bǿà mèpvng (7) nøng wawe rvtø̀ taq shøq yv̀ngà. Svrabín koqkv́mpè John Paul (II) nø Aliaga wa tǿshì vsvng tiqgǿ taqkèní shvnvtí wvpmò we vhǿm yv̀ngà we ínìgø Mari koqkv́m mè yv́ngkèní roqgvr we jejú rvt lutshì lún yv̀ngà.
AD 1945 nǿng taq American rìí Japan móng svng vnuqmyū bùm dvshōrā bǿà mèpvng Hiroshímá myuq shvngbe nø vba dvtø̀l vpo yv̀ngì. Vsv̀ng go rø vní yá sèn rvzé gø shì yv̀ngì. We myuqò 15 ming gùr gùr vlwe vsvngrì shvngbe bùm dvshaqí shì yv̀ngì.
Wedø nvmbat (2) mònggv̀n mvjàn Hiroshímá taq dàlv́m dø íwe dvjà tiqlòng bø̀n bung yv̀ngì. We myuq nvng (1) ming vsvr we shvrà taq Catholic shvrúng shú (8) gǿ vlwe shvrà tiq shvrà nø bùmí mvra kéyv̀ngò. We shvrà taq vlwe shvrúngshú rì svng be vsvk lut shì lún yv̀ngà. Yalòng dvjà nø Mari koqkv́m kaq svng vlǿm shìwe rvt íe wanø̀ vtàn ráà.
Italy móngdàn taq cáng lù:ngò we shvrúngshú tiqgǿ vle. Àngí cáng lù:ngò dvgvp cáng kaq svng røtnò e, nàí svre vtang nø kapà íe wa røt nò dvgvp Rosary svng svre vtang íe wanø̀ vtàn ráà we gø vl yv̀ngì.
Nøngmaqí Rosary vjúrøt shàì we nø mònggv̀n rvgaq dvpvt gø muqlàng móngdàn svng mvtuq we svmi móngdàncè taq v́l vdu we pvlàcè rì dvpvt gø vjúrøtāì we íe. Tiqni rvtø̀ taq àngmaq nvng nøngmaq shvngbe nø muqlàng móngdàn taq tiqchø̀m tiqrvp cèrì dø v̀l daqì e walòng svng kám shàìe.
Rosary hǿng svng svyong taq gwéì we mǿí ni langshàì we nø Mari koqkv́m mèò mvkok we ìshøt svng vtoshì lún we íe. Rosary wawe nø ngànshà cáng í svre vtang íwe shvnvt tiqlòng ni íe. Wervt nø̀ shvngø̀mré vsv̀ng shvngbe svng Rosary vjúrøt dvzaq shì ràwe dang dvkv́m wegø íe.
