Gar we lúnlv́m júrøtkàBiman shaq nvng wàlv́m Zàywà mvdò shø̄lshú dvpvt Dawi Shvgùn Zàywà

5Yehowaé, ngà shø̀nkà svng ètángangà. Ngà rvlàngkà svng dèdv̄māngà.
2 Ngà koqkv́m nvng ngà Gvrayá, dvbv̄nglv́m ngà vkøkkà svng ètángangà. Pàwálv́m wani Nà svng ngà røtshø̀nge. a
3 Yehowaé, ngà kà svng sháng mvgágá Nàí ètá lú:ngòe. Nv̀msv̄r mvtúí ngà júrøtkà Nà svng shvyūl lóngò nø gv̀mgvm cāngòe. b
4 Kadø íe wani Nà nø mvgv̄m we svng wv́mshì we Gvray mèí. Màshup màbóng lòng nø Nà taq màvl.
5 Dvshv́ngshì rìí Nà mv́rdv̀ng rip mvngut lú:ngò. Mvgv̄m we wàòrì shvngbe kaq Nà shèngōshie. c
6 Vyákà shø̀nrì kaq Nàí shèmá:ngò nø; Shvwi shvyǿ vsvng nvng yùmvm vsvng kaq Yehowa Nà ènǿmshìe.d
7 Iwe ngà nø Nà mvkok dvdí nøt luqtv̀m rvtnø Nà chø̀m svng gòng longe. Vpǿ svre nø:tní Nà shànshér tø̀ngnø taq ngàí Nà svng noqlv́m íe.
8 Yehowaé, ngà svng ngv̀nshà rì rvtnø, Nà døngman tvrà taq ngà svng èshø̄là. Ngà vzv̀ngzv̀ng Nàí tvrà mèdóngāngà.e
9 Kadø íe wani angmaq shø̀n kà taq kv́mv́m daq we tiq kà gø màvl. Werì dòngnøt taq nø shvtìn gvyaqlv́m nøt dvchǿng zv́ngshìe. Angmaq pvyūng nø vtánshaq dvgv̀m í nø, angmaq pvlèí shvring rā lòng gø vhúng íe. f
10 Gvrayé, angmaq mvrà mesøngāò. Angmaq gvcvt taq angmaq laqvtungvm. Angmaqí vléò mvrà luqrvt angmaq svng èlù:ngò. Pàwálv́m wani angmaq nø Nà svng vtúshúrì íe.g
11 Wedø ínìgø Nà vdòng taq máshìrì shvngbe nø laq dvbù. Dvbù nø:tní dvciqciq zàywà laq wā. Nàí werì svng èga:rò rvtnø, Nà bø̀ng svng shóngshì rìí gø Nà vdòng taq shvwéshì laq lú:nò. h
12 Kadø íe wani døngman vsvng kaq shvmánāshú pè nø Nà èíe, Yehowaé. Dvgàí gā:rò padø, Nà jejúí ang svng èga:rò.