Yesu dvbù we
70 pè vtv́ng ráì we
17 We shvngøtcé pè nø, shaqshaq wa vtv́ng ráì nø, “Vkàngpèá, Nà bø̀ng kèní nø cángrìí gø nøngmaq vmíng svng cà:nòe,” a:lòe.
18 A:ngí angmaq svng a:lò we nø, “Satan nø muqcøn còngmè lap dø muqlàng kèní vjáá:mì we svng Ngàí yv̀ng bǿngà. k 19 Etánø̀ng, vbø̀ nvng muqhèrì svng lv̄mlv́m gø, ngv̀nshà pè jórnònggùn shvngbe svng dv́ngkelv́m dvpvt gø, vmíng vkv́ng Ngàí namaq svng vzíshaq íe.
Namaq svng nø kapaí gø dvlá mèlún lóngnø̀ng. l 20 Iwe cángrì nø namaq vmíng lv̀ngpvng cv̀n rvtnø mèdebùnøngni. Namaq bø̀ngrì muqlàng taqlapmø vrūshaq íá:mì rvtnø mv̀ng dèbùnøng,” a:lòe. m
21 Wervtø̀ taq Yesu nø Shànshér Pvlàcè vdòngø dvbù nø yadø wae. “Vpèá, muqlàng rvgaq Angkàng pèá, Nà svng oqà. Pawá wani yadv́ng pv̀n nø gvcvt vdárì nvng cíngrálnøt gōngrì kèní Nàí èmáò nø, sv̀ngshv́r cèrì svng lè dèta:nòe.
Íe, Vpèá, yalòng nø Nà èwv́mshì lòng íe. n 22 Vl dv́ngte shvngbe nø Vpèí Ngà svng tvleshaq íe. Vpèí wa mø̀í nìnø, Angcè Pè kagǿ í we sháò vsvng màvl. Vrá Angcè Pè nvng Angcè Pèí dvta:nò rìí wa mø̀í nìnø Vpè kagǿ í we sháò vsvng màvl,” wae.
23 Wekvt Ang lv́m poshì nø, coqcv́nrì svng mvyø̀:ní a:lò we nø, “Namaqí èyv̀ngnø̀ng rì yadv́ng pv̀n svng yv́ng lú:nò we nē rì nø ìshøt ìgv̀n v̄le. o
24 Kadø íe wani Ngàí v̄la:tnìni, namaqí èyv̀ng bǿshà rì svng nø kàdvtutshúri nvng koqkv́m rì mvmeí yv́ng mvyǿ we, yv́ng mvlún yà:ngò; namaqí ètá bǿshà rì svng tá mvyǿ we ínìgø tá mvlún yà:ngò,” a:lòe.
