Àngwà náni lvbán (25), Year B
Ya lvbán taq tálúnì we jømciq rì svng nøt cun dvtøp shàì nø pvlàcè nònggun lushìlv́m nø Dvzv́rrì 3:13-26, 4:27-30 vdòng taq Kàngpè Yesu nø shvngbe nvng singwe dvzv́r tiqgǿ íwe dang yv́nglún shìwe gø íe.
Yesu Kristu nø àngò nøt mvsø̀n rì svng coqcv́n rì svng zángā lv́m dang gvzà ni yvkwe tvrà íyv̀ngì we ínìgø làngdø̀m taq shv̀nshér pvlàcè ò dvbangā we jejú kèní dvzv́r Peter nø Yesu Kristu ò dvzv́r tiqgǿ íbǿì we dvng svng 2 Piter 1:1 “Yesu Kristu àng vshuq nvng dvzv́r ǿngà pè Simon Piter ngàí, nøngmaq Gvray nvng chv́ng kàngpè Yesu àng døngman lòng taqkèní nøngmaq døni, dvcháchá vpǿ we kv́mnøt riprà èlún bǿshàrì namaq svng shvrikàri vrongvtnòe”. wanø àngò shvngø̀mré àngnvm àngchvngrì kaqsvng gø àng tiqgǿ døni nøt mvsø̀n taq zángshì lúnlv́m dvpvtrvt ègoì we íe.
1 Piter 5:5 taq “namaq sholaqrérìé, shaqré rìí øp we lv̀ngpvng ècv̀nnøng. Vrá tāsvng tàle dàzø̀me we taq namaq nø cipshì lù:ngí juqnv́m ènv́mshìnøng. kadø íe wani kàru taq, “Gvrayí nø dvshv́ngshì rì kaq vtùò nø cipshì rì kaq jejú zí daqòe.” wa vrushaqíe. wedøni dvzv́r polò gø àngò kàru rì taq àng tiqgø gø Yesu Kristu ò dvzv́r vshuq tiqgǿ ǿngàe wawe dang ri svng shvng shvng wa vtàn ráà we íe.
Catholic shvngø̀mré mè ò shølshú vgo pè Svrabín Francis ò àng bv̀nlì dø̀ngjá wawe nø Servant of Servant wawe dvzv́r rì ò dvzv́r íwervt Svrabín vrv̀m nø vdè ò shvngø̀mré svng vcù:ng we rvtø̀ dvtú kàru rì vrìngvt nò we rvtø̀ rì vrv̀m làngdø̀m taq dvzv́r rìò dvzv́r ngà vshuqpè wanø̀ wur mv́r shvmvr shìwe svng gø yv́nglún shìe.
Dø̀ngku tiqlòng ò dvzv́r wawe nø àngpè ní àngmè gǿní ni íe. Ya lvbán ò jømciq rì taqkèní shvdǿm we taq nøngmaq shvngbe nø dvzv́r, vshuqrì ò nøt mvsø̀n zv́ngshì ràwe dang shǿn mvyǿ nø dvtú wenø mǿí wedø tiqdvchá nøngmaq tiqgǿ nvng tiqgǿ dvhø̀ taq cipshìwe nøt taqkèní shóngnøt kèní vzø̀:mìnø̀ tubúm mvkok kelv́m svng wá dvzaqshì ràwe dang dvtú we íe.
Mvkok dvdí nøt dv̀nzø̀ng we vsv̀ngrì kagǿ taq ínìgø tasvng tubúm kèwe nvng dvzøm kewe bv̀nlì rì vrvmvm we mv-vl, shǿn mvyǿ we taq vdè ò lvpat tvrà taq dvzøm bv̀nlì rì wá mvká we, tubúm we tvrà wá mvká we, shóngnøt zí mvká we rì svng shǿn mvyǿ we íe. Gvrayí nø vsv̀ngrì ò zìdang vkáng vya rìsvng yv̀ng we mǿí, vsv̀ngrì ò dòngnøt mvsø̀n rì svng wa yv̀ngwe gø íe.
St. Francis Desel taqkèní gø vmíng vkáng vlnø dvgùng gùngshv̀ng vle wawe nø vháng vtang we mǿí, shóngnøt tewe vsv̀ng mvngnø Gvray àngmv́r dv̀ng taq ngór dvgùng vlwe íe wanø̀ dvtú ráà. Rvcángcè tiqgǿ wanø̀ bǿnlún lv́m dvpvt nø Yesu Kristuò laqyà rìdø Gvray àngò shóngwám shìwe tvrà rì svng cv́n dvgøm lv́m nø vchvk mvdø̀ng tiqlòng ni ílonge.
Tiqdv́ng vsvng kaq yv́ng mvtv̀:vm we nøt laqyà rì nø we tiqdv́ng vsv̀ng kaq vháng we zidang svng tuq dvzv́r lv́m tvrà svng vgámā we gø ílong we írvtnø̀ tiqdv́ng vsv̀ngrì kaqsvng vhángwe zìdangrì svng tuqlún dvzv́r lv́m dvpvt nø shóngnøt kèin[ tubúmā we nvng cipshìwe nøt laqyà rì taqkèní dvzø̀mā we nøt laqyà kèní mv̀ngnø we vsv̀ng rì kaq shvlá vtang tubúmā we ni ílonge.
Tán tiqdang taqkèní nø dvgoq we nøt mvsø̀n kèní dvzømā we mvwáshì lv́m vchvk we gø íe. Vdè tiqgǿò lvpat tvrà vnvp lv́m wawe nøt mvsø̀n kèní tiqdv́ng vsv̀ngrì kaq svng mvshiq mvshv̀n we nøt laqyà rì kèní dvzøm dvbangā we tvrà rì nø tiqni rvtø̀ taq we tvrà nø jø̀ng jǿngni vrø̀lvm we írvtnø̀ wedø íwe nøt laqyà rìsvng vgám ràwe gø íe.
Nøt mvsø̀n shèrwe wawe nø vdè góng vdè svng shóngshì nø vpǿ shvring shìwe nvng gø vbónge. Wedø nøt laqyà rì taqkèní vdè góng vdè gø kv́mnøt téwa shvzvtā lún longwe gø íe.
Wervtnø̀ vko vkáng rìò ngàshà wawe nø nøt mvdøng we dvgoq nøt ni íe. Mother Teresa shø̀nyv̀ngì we taq vjúrøt dvzaq shìwe ò àngshí àngwvt nø dvsháza shóngnøt ínø̀, we dvsháza shóngnøt ò àngshí àngwvt mv̀ngnø tiqdv́ng vsv̀ngrì kaq dvzømā we, tubúm dvbānga we íe wanø̀ vtàn ráà.
Nøngmaqí vtoshì lúnì we Gvray àngò jujé gømpaq rìsvng vrá vwv́nā shálv́m gø vchck tiqlòng íe. Tiqdv́ng vsv̀ng taq rà vchvk we dangrì taq mvng tubùm dvbangshì lv́m, vdè wá èlúnò we zìdang kèní dvzømshì we tvrà rì nø shvla we bv̀nlì rì ni íe. Wedø shvla we bv̀nlì rì shvngbe svng Gvray àng shóngwám shì longe. Wedø íwe bv̀nlì rì taqkèní Gvray àngnvng tvpníshì lúnìe. Wervtnø shvla we bv̀nlì rì svng wálún lv́m dvpvt rvtø̀ zíshì lv́m wàì werì shvngbe nø nøngmaq dvpvt muqlàng móngdàn ò shv̀mzupoq gø íe wanø vtàn ráà we íe. Shvngbe taq cipshìwe nøt mvsø̀n laqyà rì taqkèní cúnshì laqlúnì Gvray ìshøt nø shvngbe mvdàm laqtuq daq.
By: Gregory
