St. Matthew
Dvzv́r rì taqkèní tiqgǿ íwe nvng dvbùshv̀ng mòngkà vru shú gø íwe Shv̀nshér pè St. Mati nø Herod koqkv́m Untibus vbat, Gabenaum wamà taqø kuya gún shú tiqgǿ gø íyv̀:ngì. Àngnø Roma dvcì rìò kuya gúnvmpè tiqgǿ íwervt mvrà vl vsv̀ng tiqgǿ íe wanø gø vsv̀ng kaya taqkèní vzel shìwe gø íe.
St. Mati svng Gabenaum wama kuya gún chø̀m taq bv̀nlì wawe rvtø̀ àngkaq svng Yesu Kristuí go yv̀ngà. We rvtø̀ kèní Mati nø àngò pø̀ zaqshøp rì shvngbe svng làng ráà nø Yesu Kristu mèpvng svng cv̀n yv̀ngì we íe.
Mati 9:9-13 “Weyv́ng kèní Yesu dìá:mì kvt, Mati tǿò we tiq pè kùyà tǿ rà yv́ng rūng dā we svng yv̀ng bǿà nø ang svng, “Ngà svng ècv̀n rā,” a:lòe. Wekvt ang tv̀m búng nø, Yesu mèpvng cv̀n bǿà. e 10 Wemèpvng, Ang nø Mati chø̀m taq v́mpà v́mlv́m námrung dvgvp, kùyà gú:nò rì nvng mvrà vl vsvng* mvme gø, Yesu ó Ang coqcv́nrì nvng tiqdø v́mpà v́mlv́m námrunge. 11 Welòng svng Farisirìí yv̀ng bǿà kvt angmaqí Yesu coqcv́nrì svng, “Namaq Svra pè nø kùyà gú:nò rì, mvrà v̄l vsvngrì* nvng tiqdø kadø̄ í nø v̄m aqe ma?” a:lòe. f 12 Yesuí tá bǿà kvt a:lò we nø, “Cìsvra nø zarì dvpvt wa zǿmdv̀nge, mvza vsvng nø zǿm mvdv̀ng. 13 Kàru taq, ‘Ngà nø shvrúng núngpà mvdv̀mø mvréza nøt svng mv̀ng té shònge,’ wa kà ang lvjø̄m ècvnshiv́mnøng. Pàwálv́m wani Ngà nø, døngman vsvng kaq go nvng dø̀ng dakngà we mø̀í, mvrà v̄lrì svng lè go nvng dø̀ng dakngà,” a:lòe.
Mati nø paqzí vlwe nvng Greek dvcì kà shawe tiqgǿ íwe taq kàru rì vru we bv̀nlì taq vlǿmvm vrvm we tiqgǿ gø íe. Àngí vru ráà we Mati dvbùshv̀ng mòngkà rì nø àngò lvpat tvrà rì, mvkrǿm mvdøp rì svng ru vshøp ráà we kàru tiqlòng íwervt kø̀mzøp nø døngmvn we kàru tiqlòng gø íráì.
Matí àngò nímzì paqzí dang nvng singnø̀ àng taqkèní Yesu Kristu ò dvcì gùn we kàrù rì yv́ngkèní pv́ngshì nø vru ráà we rvt nímzì dang taqgø lànglì tiqgǿ wanø̀ bø̀ngshv̀ng yv̀ngì we íe. Mati dvbùshvng mòngkà taq Yesu Kristu ò lvpat tvrà yv̀:ng gùng svng vru ráà we mǿí nø̀ Yuda vtóng kèní øpkáng we rvcángcè Yuda rìò kv́mnøt tvrà svng nùnggon ziwe dang kèní vru ráà wegø íe.
Mati taqkèní àngò dvbùshvng mòngkà rì taq Yesu Kristu svng Yuda rì í yv́ng mvtv̀mvm we nvng mvkv́m wervt àngmaq ò móngdàn svng Messianic móngdàn kèní shvmv́ng lv́m íwe dang vru yv̀ngà. Shv̀nshér pè Mati svng nø pø̀ zá taq bv̀nlì wawe vsv̀ngrì nvng kuya gún we vsv̀ngrì kaq roqgvr we shv̀nshér vsv̀ng tiqgǿ ku mvsat shìwe gø íe.
