The Exaltation of the Holy Cross
(Shv̀nshér we Yesu wurgáng bóy àngni)
Koqkv́m mè Helena ò dvzaq dvkáng shìwe kù:ngà rvt Yesu wurgáng vjǿng lòngsvng AD 326 nǿng taq yv̀ngyà:ngà nø wurgáng àngcip cèrì svng mònggv̀n døngdv́ng taq vlwe Christian móngdàn rì svng vwv́l ò nø̀ tùyv̀:ngà we íe.
Wurgáng àngtøm lòng svng mv̀ngnø Rome taq vlwe shv̀nshér we Yesu wurgáng bø̀ng tǿò we noqngø̀m tø̀ngnø (vzv̀ngkaq St. Helená koqkv́m kó) taqø gø PA Sirica noqngø̀m tø̀ngnø rì taq gø rvda ráà we íe.
Vtvng kèní shv̀nshér nø vpǿ ringwe Yesu wurgǿng svng vpǿ shvring nø noqngø̀m we tvrà tiqni mvdv̀m tiqni mònggv̀n dø̀ng taq vsher ráì wervt vzv̀ng kaq Yesu wurgáng hang rì svng vtù nø gvsat we nv̀msvr móngdàn koqkv́m rì kèní kutwa vto lú:ngà wegø íe.
AD 614 nǿng høqshaq Yesu wurgáng tiqtuq svng Jerusalem wamà taqø rvda yv̀:ngà we ínìgø we nǿng vdòng taqni Jú dvcì gorø (26000) gó dv́ngte vbáwe Bashán cìdvp kèní Jerusalem wamà svng gvsat vtøl yv̀:ngà mèpvng nø rvcángcè Christian rìò vmíng Āna rìsvng pàti mvlvn we wápv̀ng ráà wegø íe.
Wewa mvtaq rvcángcè rì gorø (90000) gó dv́ngte gø lvpat rì zíshì vdu yv̀:ngì nø we shv̀nshér we shvrà rì shvngbe svng gø gvyaq ráà wegø íe. Làngdø̀m taq Yesu wurgáng svng høqshaq Bashá móng svng ríyv̀:ngà we íe.
13 nǿng naq bǿì mèpvng Heraclius nø Bashá móng svng vrá gvsat dv́ngke bǿà nø Jerusalem kèní BAshá myuq svng ríyv̀:ngà we Yesu wurgáng rì nvng rvcángcè rì ò zaqshøprì svng vrá vtv́ng lún yv̀:ngà we íe.
Wedø íwe màná dø̀mrø rì svng dvdv:mì taqsó:rí Catholic shvngø̀mré mè taqnø September 14 ni svng Shv̀nshér we Yesu wurgáng bóy àngni wápv́ng shìráì wegø íe.
Heraclius àng gø AD 629 nǿng taq Jerusalem taq wáshì yv̀:ngì we Shv̀shér we Yesu wurgáng bóy àngni svng dinø noqngø̀mwe wáshì yv̀:ngì nø Ju dvcì rì svng Jerusalem wamà vdóng svng mà dvgòng lv́m wawe Hadrian Uqbvdi svng gø vrá dvtøp shvnvp ráà we íe.
Nǿngrì mvme vmv́ng yv̀:ngì we Yesu wurgáng vjø̀ng lòng nø nv̀mlat àng wurgáng ò 3 wv́l 1 wv́l dv́ngte wa ngv́mshì yv̀:ngì we svng yv̀:ngà we íe wanø paqzí vdè rì taqkèní gø gùn dvtøp we wà ráà we íe.
