Jò we tvra lòng nvng mvjò we
Vsv̀ngrì taq jò lòng nvng mvjò lòng vzø̀ng we taq gvzàni nøt vyuq we svng yv́nglún shìe. Jø̀ng jǿng taq jòwe nvng mvjò we wawe nø tiqgǿ nvng tiqgǿò síngrv́l nøt rì, mvkrǿm mvdøp rì màbóng we taqkèní bung longwe àng mvtú tiqlòng gø íe.
Vdè tiqgǿ taqkèní èlv́nò we (Perspective) wawe, vdèí èyv̀ngò we (Dimension) rì, rvwvl nøt rì, rvtø̀ àngdvjà rì màbóng we ínìnø tiqgǿ nvng tiqgǿ ò vtoshì we tvrà gø vsháyvm we íe. Wervtnø̀ tiqdv́ng vsv̀ng wawe mvdàm vdè tiqgǿ taqgø cv̀n lvpat taq vdèò síng rv́l nøt nvng vsvk tevm mèpvng síng rv́l nøt rì nø màbóngvm nø vshv́y we svng yv́nglún shìwe íe.
Àngcǿ àngcè rì taqkèní nø vdè àngpè, àngmè shvrà svng ètuqvm we rvtø̀, bv̀nlì dvzv́r shúrì taqnø vdè bv̀nlì àngkàng wawe shvrà taq etuqvm we rvtø̀ rì taq vsháyvm we síngrv́l nøt rì døni døngmvn we tvrà, síngrv́l nøt tiqlòng svng tuqlún, vtoshì lúnlv́m dvpvt rvtø̀ tiq rvtø̀ høqshaq cā ràwe gø vl longwe íe.
Wedø íwe tvrà rì taqnø tiqgǿ nvng tiqgø nà zø̀ngwe tvrà nø vjú mv-vl we tvrà gø ílonge. Vsv̀ngrì tiqmaq taq døngmvn we tvrà tiqlòng wanø̀ vdè tiqgǿ taqkèní nàto bǿò we dang svng tiqdv́ng vsvngrì taqkèní gø wedø ni vtoshì dvzv́r mvyǿ we nøt zv́ng shìvm wekvt tiqgǿ nvng tiqgǿ nø nøt màrv́mvm we írvt vzø̀ng lv́m tvrà rì bung longwe gø íe.
Wervtnø̀ vdè taqkèní jòwe, mvjò walòng svng tiqdv́ng vsv̀ngrì nvng vzø̀ng lv́m tvle vdè góng vdè taqni mvdø̀ng singwe irvtnø̀ tiqdv́ng vsv̀ngrì kaq gø síng sháā we nvng dvsháza nøt gø gv́l shì lúnlv́m gvzàni vchvk we íe.
