Ìshøt ìgv̀n kà
20 Ang coqcv́nrì svng dvjaqò taqsórí Yesuí a:lò we nø, “Mvshámhoq dèshànøng rì namaqí nø ìshøt ìgv̀n lúnlv́m íá:mì; pàwálv́m wani Gvray móngdàn nø namaqò èíanø̀nge. j
21 Yadvgvp svrí èshìnø̀ng rì namaqí nø ìshøt ìgv̀n lúnlv́m íá:mì; pàwálv́m wani namaqí vgá èlún daqnø̀nge. Yadvgvp rèyù rèyúngnøng rì namaqí nø ìshøt ìgv̀n lúnlv́m íá:mì; pàwálv́m wani namaq nàhø̄shì lóngnønge. k
22 Vsvng Angcè Pè Ngà rvtnø Vsàngí namaq svng shèngōvtnøng, rewìngvtnøng, dècø̄vtnøng, namaq bø̀ng svng mvgv̄m màshvla pv̀n dø shèyǿmvtnøng kvt, namaqí nø ìshøt ìgv̀n lúnlv́m íá:mì. l 23 Wervt dèbùnøng nø èchóngshìnø̀ng.
Pàwálv́m wani ku, muqlàng taqlapmø namaq zìbè nø ringe. Angmaq angkop angkàng rìí gø welòng døni kàdvtutshúri svng wà yà:ngà.
Dvshà mvhøt kà
24 Iwe mvgàmrérì namaq nø mèhøt lóngnø̀nge; pàwálv́m wani namaqí nø shøtshú lòng èlúnvm bǿshà. m 25 Yadvgvp nàgànøng rì namaq nø mèhøt lóngnønge; pàwálv́m wani namaq nø svrí èbang lóngnønge.
Yadvgvp nàhø̄shìnøng rì namaq nø mèhøt lóngnønge; pawá wāni namaq nø rèyùnøng nø èngǿ lóngnønge. n
26 Vsvng shvngbeí namaq svng shvlae, èv̄lvtnøng kvt nø mèhøt lóngnønge; pàwálv́m wani angmaq angkop angkàng rìí gø mvdø̄ng mvmān kàdvtutshúri svng wedøni shvlae, wa nø shvgùn yà:ngà we íe.
