Za we angpv̀npv̀n dvbā:nò we

38 Júrøt chø̀m kèní Yesu búng daqì nø, Simon chø̀m svng gòngá:mì dvgvp, Simon angnìmè nø góng gvzà vkatshi weí zā da rvt angmaqí ang dvpvt Yesu svng røtnāòe. s

39 Svmaré mè shvnvngø Yesu rip ráì nø, vkatshi nø zālòng svng ngv̄n bǿà kvt, vkatshi lòng shø̀má:mì nø, wela:ngí ang søt kungshì lú:ngì weí angmaq svng dvzø:mòe.

40 Nv̀m vlē daqì dvgvp, dvlí dvjv́ng angpv̀npà:ní za vsvngrì Ang yv́ng svng shøla:tnà nø, A:ngí angmaq tiq gǿ nø tiq gǿ mvdv̀m Ang wūr hapshì nø dvbānaòe.

41 Vrá vsvng mvme kèní cángrì lúshì taqsórí, “Nà nø Gvray Angcè Pè èíe,” wa nø vkiqe. Ang nø Kristu í we svng cángrìí sháò rvtnø, A:ngí angmaq svng ngā:nò nø, kà shǿn màdvzá:rò. t

42 Sháng gá daqì dvgvp Ang búng nø, mòngzø̀l we tiq yv́ng svng dìá:mì. Vsvng loksokrìí nø Ang svng láò nø lá lún bǿà kvt, angmaq yv́ng kèní lamvlov̄m dø, Ang svng vgv́rlv́m dá:nòe.

43 A:ngí angmaq svng, “Dvgá mvrìng rvwá rì svng gø Gvray móngdàn Dvbùshv̀ngkà mvshǿl dvshv̄ng rànge. Wedø dvshv̄nglv́m rvt Ngà svng dèzv́r dakngà we íe,” a:lòe. u

44 Weyv́ng kèní Yesuí nø Yuda móng júrøt chø̀mrì shvngbe taq mvshǿl dvshv̄ng mā:nòe.