Nv̀m vlevm høq gø shv̀mná mèrínøngni
Shv̀mná èrínøng nìgø mvrà nø mèwànøngni. Nv̀m vlevm høq gø shv̀mná mèrínøngni. w 27 Vrá cáng v́lrà mèyilanø̀ngni. ( Ephesians 4:26-27)
Christu taq shóngshø̀ngwe vnvm vchvng rì, Efesus rì kaqsvng vru yv̀ngà we lèga 4:26-27 taq dvzv́r Polo nø “Shv̀mná èrínøng nìgø mvrà nø mèwànøngni. Nv̀m vlevm høq gø shv̀mná mèrínøngni. Vrá cáng v́lrà mèyilanø̀ngni.” wanø nøngmaq dvpvt vchvk vtang we pvlàcè lvpat dvrá svng shønrvn yv́ng dvzv́r ráshà we íe. Shv̀mná mvgø̀r we nøt svng nøt maq nøt vdòng taq rvtø̀ èzí bǿò wekvt nøngmaq vdòng taq ngànshàpè zángshì rawe ínø Gvrayí nøngmaq svng vzíshaq íwe shvmv́n jejú rì svng vtølv́m bǿòe wanø dvzv́r Polo í vtàn ráà wegø íe.
Shv̀mná ríwe nø mvrà mǿí we ínìgø we shv̀mná nøt svng vdè nøt vdòng taq shvrà ezí bǿò we nvng tiqdáng vsv̀ng kaq mvrà chutā mvwá shìwe nø Gvrayò dvrá svng vléshì we íwervt Gvrayò shvmv́n jejú rì svng dvdam vnáshìwe gø íe.
Nøngmaq bashà rì nø vdè kaqsvng vsv̀ngí vléshì rawe kvt shv̀mná vsorì wewa íe. Welòng nø shvngbe taq bø̀nwe nøt laqyà tiqlòng ínø Kàngpè Yesu taqgø bø̀nbun yv̀ngì we íe. Mati 21:12 “Yesu nø Noqngø̀m Tø̀ngnø svng gòngá:mì nø, Noqngø̀m Tø̀ngnø taq wv̄nvm rì nvng nv̄mv̄m rì shvngbe svng lù:ngò sórí, gv̀msùng cheshi rìò shvbóy rì nvng kāø nā:mò rìò rúngrà rì svng ngaqāòe.” Wanø Yesu Kristu gø shv̀mná vsor we dang shv̀nshér kàru taq yv́nglún shìwe íe.
Yesu Kristu nø àngpè Gvray kaqsvng shóngshì we ínø̀ vsv̀ngrì kaq vmupvm we vsv̀ngrì svng mvshóng wámshìpè gø íe. Parishi ri dø íwe vsv̀ngri kaq téwa shv̀mná mvgø̀r pè íe. Ínìgø Yesu kristu nø vsv̀ngrì kaq mvrà chutā we mvrà chut, chángshú pè íwe svng gø dvdam vná mvdaq long. “Baraba svng shvlut nø Yesu svng wurgáng mvdàm nàtaqò wanø̀ vkiqwe vsv̀ngrì dvpat Yesu àng kønshaq zíshì høqshaq shóngnøt vtàn yv̀ngà.”
Jø̀ng jǿng taq tiqdáng vsv̀ngí vdè kaq vléshì bøwe mvrà rì rvt shv̀mnárí we mvdàm vdèò dòngnøt mvsø̀n taq bø̀nbung we vdè góng vdè ídǿm shìwe nøt rìrvt téwa shv̀mná mvgø̀r nøt svng bǿn dvzv́r we íe. Shv̀nshér kàru taq vdèò shv̀mná vsor we nøt svng cipshì lv́m shvngøt dvtú we nø Yaku 1:19-20 “Ngà shóngshøng we vnvm vchvngrìé, vsvng kagǿ gø, tálv́m yv́ng vpán nø, shø̀nlv́m yv́ng nø vtǿn nø; shv̀mná rílv́m yv́ng gø vtǿn rà we svng leq shánøng. Pàwálv́m wani shv̀mná høp lù:ngí nø Gvray Ang døngman lòng wà lú:ngò we màvl.” wanø vru yv̀ngà. Kashvgøp 19:11 “Rvwv̄n shánø:tní nø tønnøt rvm lú:ngòe. Vlé rā lòng svng màmvsø̄nga lòng nø dvgùng íe.” wanø gø yv́nglún shìe.
Shóngshø̀ng we pè, mè, vnvm vchvng maq shvngbe svng dánglúnò pè Gvray nø shvmv́n jejú nvng dv̀nzø̀ng we lvpat svng vtoshì lúnlv́m dvpat shvngbe svng èzíbǿ shà wegø íe. Wedøni Yesu Kristu taqkèní gø nøngmaq kaqsvng té vtangwe shóngnøt rì kèní èchut, èchv́ng bǿshàwe írvt àngò shóngnøt kùlwàng vdòng svng ègoì we íe. Kadø íwe rvtø̀ dvjà rì vdòng taq ínìgø mvrà chutā sháì we vsv̀ng bø̀nlún lv́m dvzaq dvkáng shàì.
Gregory
