St. Raymond Nonnatus
St. Raymond svng nø àngmè ò puqwá svng ngéò nø̀ shøq yv̀ngà we taq àngmè shì yv̀ngì we tiqgǿ gø íe. Raymond wawe àngbø̀ng lvjøm nø Spain dvci kàtaq (Nonnatus= not born) mvshøqò we wanø lvjøm lúnshì we íe. Àngmaq rvp nø dvshàwe tiqrvp ínìgø Gatalonia dvcì kèní tiqrvp gø íe.
St. Raymond àngnø Machinterian shvrúng shú mvdò svng gòngyv̀ngì nø àngò dvzaq dvkángshì we kùngà rì taqkèní àngò lvpat svng gø dvhángā ráà we tiqgǿ gø íe. We shvrúngshú mvdò svng nø St. Peter Nolas kèní vrang yv̀ngà we íe.
LG svng dinø kám vsv̀ng vshuq rìkaq chutcháng yv̀ngà. Ínìgø àngò pø̀ gv̀msùng rì nvng àng mvdò ò pø̀ rì shvngbe dvbé yv̀ngà we íe. Lv̀ngdø̀m taq we vshuq rì svng chánglv́m pø̀ mv-vl bǿì we rvtø̀ taq àng tiqgóng svng kámshì nø tung svng gòng yv̀ngì we íe.
Wedø tūng vdòng taq rungwe rvtø̀ àng kaqsvng shvnip shvnvr we, dvki vrè we gvzà vhǿm yv̀ngà. St. Raymond àng tūng rungwe rvtø̀ taq tūng vcúngshú dū pè svng nøt vlíng lv́m dvbùngshvng mòngkà kèní nìmò wervt àngò nv̀nggøp svng coqcì í gvraqā ò wegø vhǿm yv̀ngà. Làngdø̀m taq nø àngò shvrúngshú rv̀mnvng rì taqkèní cháng bǿà wervt tung kèní lutshì lún yv̀ngà.
AD 1239 nǿng nø àng Spain móng kaq svng loámì nø àngkaq svng Svrabín koqkám Gregory IX taqkèní St. Raymond svng Cardinal vya kámā yv̀ngà we íe. St. Raymond nø àng lvpat 36 nǿng taq Rome svng diwe rvtø̀ we zaqlè tvrà taqø ni lvpat béyv̀ngì.
St. Raymond svng nø cv̀mré shøqlv́m àngmè rì, cv̀mré shøqā shú cì svra, maq rì nvng mà dvrá dø shvnip shvnvr we vhǿmò vsv̀ngrì dvpvt vlǿmrà shv̀shér vsv̀ng tiqgǿ gø íráì we íe. Shvngø̀mré taqkèní gø àngkaq svng dvgùng shvring lv́m, za vsv̀ngrì dvpvt láng ràwe svmi tvróng nvng vtì svng gø shvmv́nā we nvng láng dvzv́r wegø íe.
