Dvrá svrarì ó Farisirì svng nga:nò we
13 “Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaqí muqlàng móngdàn bv́ngkà nø vsvng lā mvgòngvm dø ècøtnønge. Namaq vdè gø mègòngnø̀ng mvdv̀mø nø, gòng rì svng gø namaqí góng mèdèzv́rnøng.
14 (Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaqí nø mēmàrì kaq angmaq chø̀m taqkèní nàmupv́mnøng dá:ngí, vjú nø yvnggúnggúng røt dèpéshìnø̀nge. Wedø í rvtnø kàngélv́m tété vlīshì lòng nø namaqí mv̀ng nàhǿm lóngnønge.)*
15 Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaqí nø, rvcv́ngcè tiq gǿ lúnlv́m rvt, nvmukdvra nvng rvgaq lø̀mlē nàriqnøng nø, èlún bǿnøng kvt nø ang svng rá namaq mvdv̀m vní dvtv̀ng høq zùpvng móng angcè wáshì dèzv́rnønge.
16 ‘Tvrà shølshú nemàn rì namaq nø mèhøt lóngnønge. Pàwálv́m wani namaqí kagǿ ínìgø noqngø̀m Tø̀ngnø svng tvnū nø dvgv́mshi we nø pàgø mø̀í. Iwe, noqngø̀m Tø̀ngnø taqò vshé svng tvnū nø dvgv́mshi kvt mv̀ng nø mvlutshì,’ èwànø̀nge. g
17 Nemàn angdál rìé, kapv̀n té vchvknge? Vshé lòng í ma? Mø̀íni vshé svng shànshér dø shvgaqò we Shanshér Tø̀ngnø lè mø̀ínī ma?
18 Vrá namaq nø, ‘Shvrúngrà svng tvnū nø dvgv́mshi we nø vdǿnshaq mø̀í. Wedø ínìgø shvrúngrà mvdv̀m taqò núngpà svng dvgv́mshi gǿ mv̀ng mvlutshì,’ èwànø̀nge.
19 Nemàn rìé, kapv̀n té vchvknge? Núngpàrì í ma? Mø̀íni núngpàrì svng shànshér dø shvgaqò we shvrúngrà lòng í ma? h 20 Wedø í rvtnø shvrúngrà svng tvnū nø dvgv́mshi gǿ ang nø, shvrúngrà svng gø, wemvdv̀m taq vl rì shvngbe svng gø, tvnū nø dvgv́mshi we nī íe.
21 Vrá, noqngø̀m Tø̀ngnø svng tvnū nø dvgv́mshi gǿ ang gø, noqngø̀m Tø̀ngnø svng gø, we vdòng taq v̄l pè Gvray svng gø tvnū nø dvgv́mshi we ni íe. 22 Muqlàng svng tvnū nø dvgv́mshi gǿ ang nø, Gvray koqkv́m rúngtv̀ng svng gø, wemvdv̀mø rūng pè Ang svng gø tvnū nø dvgv́mshi we ni íe.”i
23 “Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaqí nø, gvrō shábv̀n gø, bv̄nzi bv̄nyang zø̄ngløm gø, shvnv̄m dø í rì gø, tiqcé wál kèní tiqwál lòng nø Gvray kaq shèrúngnø̀ng we; dvrálòng taq tété rīng nø̀ gvzà dvkv̀ng we døngman dø dvràlv́m nvng dvsházālv́m nvng nøt tǿng kv́mv́m vrv̄m we; yarì svng nø rá namaqí mècv̀nnøng. Yadv́ng pv̀n gø dvgá rì dø tiqdvchá cv́n rà we íe.
