Àngwà náni lvbán (21) Mòngkà

Christu taq shóngshø̀ngwe pè, mè vnvm, vchvngrì ya lvbán taqnø noqngø̀m nǿng (b) nǿngò àngwà náni lvbán (21) lvbán svng tuqráì we íe. Yohán 6:68 (Wervtnø̀ Yesuí we tiqcé vní pè svng, “Namaq gø èlonø̀ngni ma?” a:lòe. 68 Simon Piterí Ang svng vtá:nò nø, “Vkàngpèá, nøngmaq nø kagǿ yv́ng svng lvlōìni? Dvciq lvpat gø̀nshaq kàrì nø Nà yv́ng wa v̄le.) wanø Peter í vtàn ráà we svng yv́nglún shìe. Dvrá dvshat 31-8 taq Gvray àngcè rì kaqsvng Egúduq móng kèní shvlut lú:ngàwe ínìgø Gvrayí dvgǿā shaq Kanan móng svng nø dvtuq mvlú:nò wervt Moshì tvle Yoshuya svng vrá rvcà:ngò nø dvzv́rò we íe. Yoshuya vbat taq shvrà luq luq svng gvsat dángké yv̀ngà we ínìgø àngò vsv̀ngrì Gvrayò dvkám kà svdiq mvdøng ráì wervt udø udø vrø̀l ráìnø kratcǿm we tvrà svng vhǿm yv̀:ngà we íe.
Wedø vsvk télú:ngì we rvtø̀ taqnø shølshú vgo ri shwegi myuq taq vhøm mvngushì nø zùpùng gvbà tiqlòng wàyv̀ngà. Pàwálv́m we myuq svng rvcàngyv̀ng má wawe taq we shvrà nø Isarael dvcì rì ò shv̀nshér we shvrà gø íyv̀ngì we rvt íe. Nv̀mlat nvmpv́ng 12:7 (Wekvt Yehowa nø Abram svng dvtánshì daqì nø, “Yarvgaq nø nà pvlí pvlaqrì svng Ngàí zílv́m íe,” a:lòe. Wervtnø̀ ang svng dvtánshì daqì we Yehowa dvpvt a:ngí weyv́ngø núngpà shvrúngrà tiq lòng vrā:ngòe.) we shvrà nø Gvrayí Abraham svng kàsvdiq vzí shaq shvrà tiqlòng gø íe. 700 nǿng rvzé vle bǿì wekvt Yakuò dvcì rì nø Yoseph nvng tiqdø Ekutu móng svng tubǿì mèpvng gvzà màléke Moshiò shølwe tvrà ku kanan móng vrá bø̀nbung ráì we íe.
Nv̀mlat nvmpv́ng 33:18-20 (Wemèpvng Yaku nø, Padan-Aram rvgaq kèní vtv́ng ráì dvgvp, Kanan móng taqò Shekem wamà svng pàmvrà tuq ráì nø, wamà nv̀mshv̀ngø shìyat kupshi yà:ngì. k 19 Ang shìyat kupshì we rvgaq wezàng nø, Shekem angpè Hamor angcèrì wūr taqkèní, gv̀msùng tiqyá la:pmí a:ngí wv̄n yà:ngà. l 20 Wekvt a:ngí wezàngø núngpà shvrúngrà tiq lòng vrāngò dá:ngí, welòng svng El-Elohe-Israel* wa bø̀ng tǿ yà:ngà.) wanø̀ yv́nglún ìe. Yakúí nø àngchø̀mè Racheal í dvgá rvgaq kèní lángvt nàwe pvrà hangrì svng rvda yv̀ngà we rvgaq íwervt àngchø̀mè ò Gvray vlwe rvgaq wanø gø mvsvtò we íe.
We Shekem myuq nø Yoseph svng rvda yv̀ngà we rvgaq gø íe. Nv̀mlat nvmpv́ng 50:24 “Wemèpvng Yosepmí angnv̄m angchvngrì svng a:lò we nø, “Ngà nø shìlv́m dv́nshø̀nge. Inìgø, Gvrayí kadø ínìgø namaq svng nàcún nàsòngnøng nø, yamóng kèní namaq svng nàgùng bǿnøng dá:ngí, A:ngí Abraham svng gø, Isak svng gø, Yaku svng gø dvgv́mshi sórí zílv́m dv́n yà:ngà móng svng vrá dètuq bǿnø̀nge,” a:lòe.” Wae.
Yoshu 24:32 “Wekvt Israel cèrìí Ejip móng kèní rí lú:ngà we Yosep ang shārø nø, Shekem wamà yv́ng, Shekem angpè Hamor angcèrì yv́ng kèní Yakuí gv̀msùng tiqyá gø̀:mí wv̄n yà:ngà we rvgaq taq kǿ:mòe. Rvgaq wezàng nø Yosep ang pvlí pvlaqrì zaqshøp íā yà:ngà.” Yoshu nø wervgaq svng Gvrayí dvkám shaq rvgaq shvring vpøwe rvgaq wanø vtoshì wegø íe.
Nøngmaq tiqgǿ vrv̀m gø Gvray taq kàciq døngwe vsv̀ngrì bǿnràwe tvrà svng cvnshì lúnì we íe. Isareal vsv̀ngrì rvt vrø̀l yv̀ngì we, vrá Saynay Shìgùng mvdàm Gvray nvng vsv̀ngrì dvhø̀ Moshií kàciq gv́l shìyv̀ngì we tvrà svng Yoshuí vrá tiqkvt kàciq gv̀lò wegø íe. Yoshuí vsv̀ng loksuk govt nàwe tvrà nø Abrahamò chø̀m vsv̀ngrì nø àngmaqí noqò we cáng pvrà rì svng gurò nø, Yaku àngchø̀mè Racheal gø àngò cáng pvrà hangrì svng gvyaqò nø Gvray kaq noqshì wedang Yoshua 24:15-18 “Inìgø, Yehowa svng namaq dvzø̄m mènēshìnøng kvt kèní nø, kagǿ svng dvzø̄m mèyǿnøng we dèni namaq rècv̄ngshìnøng. Yufrat Rvmè kupa nvkop nvkàng maqí dvzø̄m yà:ngà we mvshá ìnvtrì svng dèzø̄mnøngni ma? Mø̀íni namaq èv̀lnø̀ng móng taqò Amori vsvng mvshá ìnvtrì svng dèzø̄mnøng ni ma? Namaq rècv̄ngshìnøng. Inìgø, ngà nvng nøngmaq rvp nø, Yehowa svng wā dvzø̄mlv́m íe,” a:lòe. m
16 Wekvt bashàrì vtv́nshì nø yadø wae: “Nøngmaqí nø Yehowa svng gu:rì nø dvgá mvshá ìnvtrì svng nø kadøwa lā dvzø̄:mìni! 17 Kadø íe wani nøngmaq Gvray Yehowaí nø nøngmaq mv́rdv̀ng taq shálv́m mvshv́lpvrá vtvngrì wàò nø nøngmaq nvng nøngmaq vkop vkàng maq svng Ejip móng, vshuq chø̀m kèní shèlut yv̀ngshà. Vsvng dvcìrì dvhø̀hø̀ nøngmaq léshàì we tvrà shvngbe taq gø ègār yv̀ngshà pè nø Ang ni íe.
18 Yamóng vdòng taq vl we Amori vsvngrì nvng dvgá dvcìrì shvngbe svng gø, nøngmaq mv́rdv̀ng kèní Yehowaí lùng yà:ngà. Ang nø nøngmaq Gvray í rvt, nøngmaqí gø Yehowa svng wā dvzø̄mlv́m íe,” wae. Wanø yv́nglún shìe.
Shóngshø̀ngwe pè,mè vnvm vchvng maq Gvray gvsv̀ng kaqsvng Isareal dvcì rì nø àngmaqò Gvray tiqgǿ ku vtoshì yv̀ngì we dang svng Yoshuí mvsvt lóng gø kvt ráà we íe. Dèni rø vdu we Gvray dvbùshvng mòngkà Yohan 6:54 “Ngà sha ke nø Ngà shvwi aq vsvng wegǿ nø dvciq lvpat gø̀nshaq v̄le. Vrá, tìsi lv̀ngdø̀m ni taq Ngàí wegǿ svng dvzunlv́m íe.” Wanø̀ dvkám ráà we dang svng yv́nglún shìe. Vrá Yohan 6:66 “Weyv́ng kèní Ang coqcv́n mvme gǿ rv́lshìá:mì nø Ang mèpvng rá mvzv̀ná:mì.” Wanø̀ Yesu Kristu svng vtiq shìwe dang yv́nglún shìe.
Yesu Kristu àngmè pvng cvnwe coqcv́n rìgø nøt vtiq ráì wervt Yesuí eloámnøng wa a:loe høqshaq bø̀n yv̀ngì. Yohan 6:68 “Simon Piterí Ang svng vtá:nò nø, “Vkàngpèá, nøngmaq nø kagǿ yv́ng svng lvlōìni? Dvciq lvpat gø̀nshaq kàrì nø Nà yv́ng wa v̄le.” Wanø Piterí shvngbe tvle Yesu yv́ng vtànò we yv́nglún shìe.
Shóngshø̀ngwe Pè,Mè, Vnvm vchvng maq nøngmaq kám vsv̀ngrì tiqgǿ vrv̀m taq gø vdèí rècvngshì bøwe kámnøt tvrà, Gvray mòngkà rì svng vtoshì bǿì mèpvng àngò dvtú kàrì taq svdiq døngwe ku cv̀nì we íe má? Møíni mònggv̀n tvrà rì taqwa cvnì we íe má? Dvdam shìlv́m tvrà vlwe íe.
Nøngmaq nø Gvray àngò dvkám kàrì, Yesu Kristuí dvtú we mòngkà rì taq cv́n dvgøm shàì we ínìgø Yoshu ò vbat Isareal dvcìrì dø ni Gvrayí ìshøt jejú rì shórā we vhǿm lúnìe. Vsv̀ng wawe nø vdè taqkèní síngrv́l nøt, rvwvl nøt kèní nàto bǿò we tvrà tiqlòng svng kadvgvp gø cv́n dvgøm lv́m ga laqni vchvk we tvrà tiqlòng íe. Gvray nvng vdè ò dvhø̀ taq kámshì bøwe kàciq svng cv́n dvgøm lv́m nø gvzàni vchvk we tvrà tiqlòng íe. Wewa mvtaq vdè nvng tvpní shì vsvngrì nvng vdè góng vdè gø kàciq døng we svdiq døngwe vsvng ílv́m vchvk we íe. Vránø svdiq døng we nvng shóngnøt gø vshøp lv́m vchvk we íe.
Svdiq døngwe taq shóngnøt màbá we ínìgø kømzøpwe lvpat mǿí we svng shvdǿmāwe íe. Shóngshø̀ngwe vnvm vchvngrì shvngbe Gvray taqø kàciq døng we, svdiq døngwe kám vsvngrì ílv́m nøngmaq shvngbe dvzaq shàì.
Gregory