Dvrá svrarì svng gùngkéò we

231 Wekvt Yesuí vsvng loksokrì svng gø, Ang coqcv́nrì svng gø, kà shø̀n nø, a 2 “Dvrá svrarì nvng Farisirì nø, Moshi tvle dvrá kà pǿnashúrì íe.

3 Wervtnø̀ angmaqí namaq svng shèngøtnøng dv́ngte nø, cv́n dvgø̄m ràe. Inìgø angmaqí wàò rì svng nø mècv̄nshìnø̀ngni. Kadø íe wani angmaqí shvngø:tnò lòng angmaqí mvcà:nò. b

4 Angmaqí nø vlishi we døngjá dvcøp dv̀ng vsvng raqpù taq hapmāòe. Iwe angmaq vdè nø werì kaq vkoqlv́m wūrhàm tiq chàmcè gø vngvt mvkv̄mshì.

5 Angmaqí wàò bv̀nlì shvngbe nø, vsa:ngí yv̀nglv́m rvt wā wàòe. Kadø íe wani angmaq bāmshi we kàru dikcèrì* svng gø dvtéò nø, bèlaq hǿngyøqrì gø yàmyàmwa shvyv̄ngshìe. c

6 Vrá, angmaq nø bóy rì nvng júrøt chø̀m rì taq té rīng we rúngrà nvng vzv̀ng lap rúngtv̀ng rì taq wa rúng mvyǿe. d

7 Gvttø̀mø̄ vpǿ gø̄ngá ra we nvng vsa:ngí, ‘Rabbiá,’* wa nø go rā we svng shóngshie. 8 Iwe, namaq svng nø vsa:ngí, ‘Rabbi,’ tǿ mèdèzv́rshinøngni; pàwálv́m wani namaqò Shvngøtshú pè nø tiq pè wa èv́lanønge. Namaq shvngbe nø angnv̄m angchvng dvchǿng èínønge.

9 Vrá, rvgaq tø̀m taq kagǿ svng gø ‘Vpè’ mètǿnø̀ngni; pàwálv́m wani namaq Nvpè v̄llv́m nø, muqlàng taqlapmø vl pè Ang tiq gǿ wa èv́lānønge.

10 Wemvdv̀mø, namaq svng nø ‘shø̄lshú vgo,’ wa nø gø tǿ mèdèzv́rshinøngni; pàwálv́m wani namaq svng shø̄lshú vgo v̄llv́m nø, Kristu Ang tiq pè wā èv́lānønge.

11 Namaq dvhø̀ taq rīng vtv̄ng pè nø namaq kaq dvzømshú lè wáshì ràe. e 12 Vdè svng shvringshì we kagǿ ínìgø, cip shvyǿm we vhǿm lú:ngòe; vdè cipshì we kagǿ ínìgø, wegǿ svng nø shvrīng lú:ngòe.