Nøngmaq lvpat rì kadø ílú:ngì we (Assumption Sunday Homily)
Shongshø̀ng we Pè, Mè, Vnvm vchvng maq yalvbán taqnø̀ Catholic sasvna taq Yesu àngmè Mari svng pvlàcè nvng tiqgóng chv̀ng muqlàng svng vbūn bǿà bóy àngni wanø̀ mvsvt shìwe lvbán íe. Ya bóy àngni svng 4 àngyá mvzuq nǿngrì vbat kèní wápv́ng shì ráì wegø íe. We tvrà svng shvngø̀mré vdòng taq kám ràwe dvrá tiqlòng ku mvsvtshì we nø shv̀shér kàru dvtan lèga taqkèní dvtú we døngmvnwe tvrà íwervt AD 1950 nǿng Svrabín koqkám Pius XII vbat kèní shvngø̀mré vtóng taq vchvk tiqlòng ku mvsvt ráà wegø íe.
Yadø íwe kám nøt mvshv́l pvrá rìnø mvtú màdá àngwa bø̀n bung ráì we mǿí Gvray mòngkà kèní dvtú ráà we àng mvtú rì taq cv̀nnø̀ bø̀n ráì we tvrà íe. Kàgvp ànglí taq yv́nglún shìwe nø Gvray ínø̀ àngí ìshøt vzíshaq íwe àngò àngcǿ àngcè rì kaqsvng nø àngò móngdàn svng chvpdvp ni goò we svng yv́nglún shìwe íe.
2 koqkv́m lèga taq “11 Angní lvngà kà dvmv̀n sórí kudø dī la:ngí ku, svmi gàrì nvng svmi gø̀mrangrì dvtánshì daqì weí angní lvngà svng dvkāng bǿà. Eliya svng nø nv̀mbø̀ngtvríí muqlàng kaq tv̀m vbūn bǿà.” wanø Eliya kaq muqlàng svng vbūn bǿà we dang vru yv̀ngà.
Wedø tiqdvchá Gvray Gvsv:ngí nø Moshì svng gø muqlàng svng vbūn yv̀ngà wanø̀ Israel vsv̀ng rì kám we íe. Moshì ò dvgv̀m wawe gø mvshǿl rì taq mvyv́ng shì we íe. AD 1854 nǿng taq Svrabín koqkv́m Pius IX nø “Munificentissimus Deus” wawe dvtú kàru taqkèní “Shv̀nshér we Mari nø mvrà shèrwe Yesu shøqlv́m cv̀mré góng svng vtoshì mè íe wanø̀ shvngø̀mré tvrá kèní shvngøt dvtú ráà. Yesu àngmè Mari nø Gvray ò ìshøt vtoshì lúnò mè íwervt àngò pvlàcè nvng shagóng gø shv̀nshér we íe, jejú ìshøt nvng dv̀nzø̀ng mègø íe.
Àngò shagóng nø vbā dvtø̀l svng vrá vtáng lv́m Gvray gvsv:ngí dvzv́rò we mǿí. Yadang svng shvngøt dvtú we tvrà nø shvngø̀mré vdòng taq vtang kèní rvnaqwe kámnøt tvrà mvshv́l pvrá tiqlòng ku shvngàng shvdøngā wegø íe.
Wervtnø̀ Catholic shvngø̀mré mè taq Shv̀nshér we Yesu àngmè Mari svng dvgùng shvring we tvrà wáshì we íe. Yadø Mari àngkaq svng dvgùng shvring we, vpǿò we nø chv́ngkàngpè Yesu laqmù rì, Shvngø̀mré mvshǿl rì, tóng dvrá rì nvng shvngø̀mré vsv̀ng tiqgø ò àng lvjøm rì svng téwa síngshá shìnø vpǿ shvring lún dvzv́r we tvrà gø íe. Nøngmaq bashà rìí vto shì lúnì we Gvray àng jejú rì svng téwa síngshá dvzv́r we íe.
Nøngmaq bashà rì nø Yesu àngmè Mari dø jejú ìshøt rì nvng dv̀nzø̀:ngì wenø mǿí, ínìgø Gvray àngò jejú rvt shv̀nshér lún we tvrà svng vto shàìe, nøngmaq yv́ngø zángshì we shv̀nshér pvlàcè ò tø̀ngnø bǿnlúnìe, kv́mnøt tvrà taq lvpat àngshv́r ku cúnshì lúnwe kùngà rì svng síngshá lú:nì we íe.
20 àngyá mvzuq nǿng rì vzv̀ng kaq bashàrì dvhø̀ taq vsv̀ng lvpat rì svng pv̀ti mvlvnwe, màpǿshì we bv̀nlì tvrà rì gvzà bung yv̀:ngì we íe. Mònggv̀n svng shvtìn we mònggv̀n mvjàn rì, tiqgǿ nvng tiqgǿ, tiq mvdò nvng tiqmvdò dvki vrè we, shvnip shvnvr kenø shvt kewe mvhøt lv́m tvrà rì gvzà bungò we mvtaq shvnvt mvzø̄ rì téwa Nuclear lvk nvk rì mv́nnø̀ lángshì ráì. Yadø íwe àng mvtú rì nø dèni bat høqshaq nøngmaq dvhø̀ vkǿn ráì.
Russia nvng Ukraine mvjv̀n, Israel nvng Iran mvjv̀n, nøngmaq Myanmar móng ò móng lvmvng dvjà rì svng yv̀ng lú:ngì dvgvp tiqgǿ nvng tiqgǿ shvt kéì we íe. Vsvng lvpat kaq vpǿ ràwe nøt laqyà rì svng gōr bǿà weni íe. Vsvk lvpat tébǿì we shaqré shaqtang rì, záyv̀ng ziqyv̀ng vhǿmò vsv̀ngrì, vsv̀ng mv̀ngpòng mvdòrì dvhø̀ taq tubùm dvbangā kérà we rìkaq mvkok lv́m vtóng laqyà rì svng gor ráshà.
Shv̀nshér we Yesu àngmè Mari kaq muqlàng svng vbūn bǿà we dang svng kám nø̀ vtoshàì we nø nøngmaq bashà rìnø Gvray ò àngcǿ àngcè rì wawe dvgùng gùngshv̀ng lúnì we shv̀nshér we lvpat rì svng vtoshì lúnì wedang shvdǿmā we íe. Shv̀nshér we Mari svng vpǿ shvri:ngì we nø nøngmaq tiqgǿ vrv̀m gø Mari døni tiqni rvtø̀ taq Gvray àngmv́r dàngø dvgùng shvring we vhǿmlv́m sv̀ng vlǿm shàì taqsórí vdè góng vdè svng gø shóngshì nø vpǿ shvring shàì we íe.
Wervtnø̀ Shvngø̀mré mè nvng nøngmaq shvngbeò àngmè íwe shv̀nshér we Mari yv́ngkèní dvtit tvle vjúrøtā we yv́ngkèní nøngmaq nø Gvray àngò dvsháza shóngnøt rì svng vto shàì we vsv̀ngrì bø̀nlv́m dvpvt vsv̀ng lvpat rì nvng tiqdá vsv̀ng rìò dvgùng svng vpǿ shvringā sháì we taqsvng roqgvr kewe vsv̀ngrì bø̀nlv́m ègoì we íe.
Dèni rø vduwe Gvray mòngkà taqgø shv̀nshér we Mari nø Gvray gvsv:ngí dvkám shaq “Eva” àngshv́r, ngànshàpè vgo svng lv̄m lv́m svmaré tiqmè íwe dang mvdø̀ng dvtúnø̀ vru ráà we ie. Mari nø àngnvm mè Elizabeth nvng vhømwe rvtø̀ taqgø àngnvng dvshá mvhøt vhǿmò we vsv̀ngrì dvpvt dàlv́m ìshøt rì shórā we Gvray kaq dvgùng shvring we vjúrøt kà “Magnificat” svng shǿn vtàn ráà we íe. We Mari ò vjúrøt kà shaq nvng tiqdø Gvray móngdàn tvpní shìráì wedang dvdam dvtøp shàìnø̀ lvpat àngshv́r, vsv̀ng àngshv́r ku vsv̀ngrì kaq dvsháza mvkok we tubùm dvbangā we lvpat taq cúnshì lúnlv́m dvzaq shàì.
Gregory
