Svrabín koqkámpè Francis ò mòngkà
Yesu Christu nø zidòng mok 5 chv̀ng nvng ngā 2 ni go svng shvluq ò nø vsv̀ng 5000 gǿ svng shv-vm ò we dang Kàngpè svng láò we vsv̀ng rì nvng ang mèpvng svng cv̀nwe vsv̀ngrì taqkèní wedø íwe nvmik gømla rì nvng àng lvjøm rì svng dvdam síngshá lv́m dvzaq shàì wanø̀ ègo ìwe íe.
Kàngpè Yesu àngò dvsháza shóngnøt wawe taq kadángte mvluq mvtàm we ínìgø tiqdá vsv̀ngrì kaq vwánā we, tubùm dvbangāwe ínìnø Gvray àngò jejú gø̀mpaq nvng vzø̀mvm we írvt luqpø̀nwe v́m-aq lv́m vtoshì lúnshì we íe.
Vsv̀ngrì taqkèní wedang nvng singnø̀ mònggv̀n tvrà laqyà vtóng tiqlòngku dvdutshì wervt mònggv̀n laqyà tiqlòngku wa àngmè pvng cv̀nwe íe. Yesu Christu taqkèní vsv̀ngrì kaq àngnø døngmvnwe gønshaq ínø̀ àngò shagóng, shvwi lòngsvng wa v́m-aq lv́m dvtú ò we íe.
Mònggv̀n tvrà rì nvng mònggv̀n zaqshøprì taqkèní nø gønshaq nvng lvpat tvrà svng kø̀mzøp dø zíā lúnwe mǿí. Mònggv̀n tvrà dvpvt kadangshì rà vchvk we ínìgø dvsháza shóngnøt dángte nø kapà taqkèní gø mòngzø̀l we lvpat tvrà longsvng zíā lúnwe mv-vl long. Wervtnø̀ dvsháza shóngnøt vshøp shàì nø Gvray tvrà nvng vsv̀ngrì dvpvt vjú zílún lv́m vchvk we íe.
Àngcǿ àngcè rì nø àngpè àngmè maqò zaqshøp rì nvng singnø vzø̀ngwe, tasvng rvwìng we vrv́m vráwe tvrà rì tìnwe tvrà rì nøt yòllv́m yv́nglún shìwe vle. Cvnshì shvla we àngpè àngmè maqò shóngnøt nvng dvsháza shóngnøt rì àngcǿ àngcè rì taq vshøp lv́m gvzà vchvk wegø íe. Àngpè àngmè maqò àngcǿ àngcè rì kaqsvng zílún we ring vtang zaqshøp nø dvsháza shóng kèní tasvng vzø̀mwe, vrv́m vrá we nvng tasvng dvbangā kewe laqyà shvlá íe.
Gvrayí ziwe mònggv̀n rvgaq mvdàm shóngnøt svng dvgùng gùngshvng shvring we nvng mǿí ni we mònggv̀n dvrèrì ò vshuqrì íe má wawe tvrà vní dang svng dvtøp shàì. Vtoshì lúnì we jejú ìshøt rì nvng mònggv̀n zaqshøprì mvdàm àng jejú svng shvring shvtà sháìe má? Kàngpè Yesu ò laqyà rì shvngpe nø shóngnøt ò manggá rì wani íe.
Dèni vbat mònggv̀n taq bø̀nwe mvjv̀n rì tiqmóng nvng tiqmóng vshvt we tvrà rì nvng Myanmar móngdàn ò tvrà svng yv̀ngì nø dvdam dvtøp lv́m gø vchvk mvdø̀ng tiqlòng íráì. Vdu vbóng we dvrá rì nvng cø̀msaq mòngzø̀l lv́m tvrà rì svng lá dvzaq shàì. Tasvng vzi vrùng wàì we tvrà rì nvng mvjàn rì svng nvr vdu á:mì. Mònggv̀n dø̀ng bashàrì taq Gvray kaq svng vlǿm shàì we nøt kèní tasvng vzø̀m lv́m gvzà ni vchvk bǿì we íe.
Mvjàn wawe nø shvngbe dvpvt cǿm vnǿn lv́m tvrà wani íe wanø Svrabín koqkámpè Francis taqkèní shvngbe svng dvtú bǿà we íe.
