Shølshú vgo nvng shìwvt dvcøp pvran we

Shølshú tiqgǿ wawe nø shìwvt rì svng dvcøpā we tiqgǿ ínø̀ shølshú wawe nvng shìwvt wawe nø kadvgvp gø màdat vzø̀m longwe gø íe. Shølshú tiqgø wawe nø tuqrawe shìwvt rì svng dvcøp dvzaqshì ràwe ínø̀ shølshú tiqgǿ taq nø kadvgvp gø shìwvt rì vkǿn we gø íe.

Vsv̀ng mv̀ngpòng mvdò tiqlòng taq shìwvt wawe gø mv-vl longwe ínìnø shølshú wawe gø v̀l lv́m tvrà mv-vl. Tuqrawe shìwvt rìsvng dvcøp shvnvp lv́m dvpvtrvt shølshú wawe v́l vdu wegø íe.

Vsv̀ngrì ò shóngshì we tvrà dang vrv̀m nvng v́m-aq lv́m, shagóng dvkúm shìlv́m tvrà rìò shìwvt rì nø svngpv̀n cúnshì we tvrà taq tiqni nvng tiqni vháng dø bung mvnshì ráì we ínø̀ wedø íwe shìwvt rì svng dvcøp we taqkèní shølshú vgo wawe gø bung ráì we íe. Shìwvt walòng svng yilshì we vsv̀ng nø døngmvnwe shølshú tiqgø mvbǿndaq wanøgø shǿnlún shìwe íe. Shìwvt íwe dángte taq vzànglvp ripnø̀ dvcøpā we vsv̀ng kaq shølshú wanø̀ shǿnlún shìe.

Shìwvt walòng nø shølshú wáshìwe vsv̀ng tiqgǿ dvpvt nøt mvsø̀n kù:ngà zaq dvzv́rā lúnwe tvrà tiqlòng gø íe. Shølshú tiqgǿ taqkèní shìwvt rì svng vnvp dø pvranā we taqkèní jór nònggwòn sv̀ng vrangā we ínø̀ wedø shìwvt rì luq luq dvcøpā lún mvbvt téwa kùngà zaqwe shølshú tiqgǿ ku bǿn dvzv́r wegø íe. Bv̀nlì wàngrì taqgø shìwvt rì vhǿmshì ra mvbvt mvkrǿm mvdøp paqzírì lúnshì mvbvt ni ílonge. Wervt shølshú tiqgǿ taqnø shìwvtrì vkǿn we taq dvcøp dvzaqshì we nø vdè ò lvpat vháng vlún dvzv́r we mvtaq vdè ò vsv̀ng mv̀ngpòng mvdò svng gø vháng vlún dvzv́r we tvrà kèní tubùm dvbangā we íe.

Shølshú tiqgǿ wawe nø vdèò vsv̀ng mv̀ngpòng vdòng shìwvt rì svng gùn dvtøp nø shvnvp dvcøp lv́m nø àng tiqgø ò døngjá ni íe wedø ínø wa shvla we shølshú shvlá wanø̀ shǿnlún shìwe gø íe. Ínìnø shìwvt wawe nø kadø íwe lòng svng v:lòwe íemá? Shìwvt wawe nø vdè tiqgǿ ò lvpat tvrà møíni vsv̀ng mv̀ngpòng mvdò ò mànggá tiqlòng lòng sv̀ng tuqlún lv́m diwe tvrà taq vhǿmshì rawe vtøp lv́m, mvhøt we tvrà sv̀ng v:lò we íe. Wedø íwe tvrà taq shølshú wawe tiqgǿ taq nø shìwvt àngpv̀n pv̀n vhǿm shìlv́m nø wedøni vl longwe íe.

Shølshú tiqgǿ taqkèní shìwvtrì svng dvcøp dvzaqshì we tvrà kèní wa jórlún we tvrà svng vtoshì lún we vl longe. Shìwvtrì wawe taq vní dang kèní yv́nglún shìwe vle tiq taq nøt mvsø̀n nvng singwe shìwvtrì nvng vní taq vtáng lvp kèní tuqrawe àngpv̀n pv̀n shìwvtrì wanø̀ yv́nglún shì longe. Nøt mvsø̀n nvng singwe shìwvtrì wawe taq vsv̀ng mv̀ngpòng mvdò rì dvhø tiqgǿ nvng tiqgǿ ò nøt mvsø̀nrì dvdam nøt rì taq cv̀nnø̀ bø̀nrawe shìwvtrì ílonge. We rì taq nøt mvgø̀r we nøt mvbyo we, shvrúngnøt rì màbóng longwe nøt màrá we dø íwe shìwvt rì ílonge.

Vrá nø vtáng kèní tuqlongwe shìwvtrì wawe taq bv̀nlì tvrà rì taq tiqpv̀n pv̀n kèní vdáng kerawe, mònggv̀n dvrè rì nvng singnø yvkwe shìwvtrì, rvtø̀ lv̀ngcha kèní bø̀nlongwe shìwvt àngpv̀n pv̀nrì, vzø̀m vzvp, vtoq vtip lv́m tvrà rì taq vhǿmshì we yvklv́m shìwvt rì íe. Tiqkvt kvt we shìwvt pv̀n vní lòng nø tiqrvtø̀ tiq shvrà taq vkǿn longwe gø bǿnsháò we ínø̀ shølshú tiqgǿ nø wedø íwe shìwvt rì svng kadvgvp gø dvcøp shvnvp we tvrà taq tvlú dvgǿ shì ràwe gø íe. Wedø shìwvtrì svng dvcøp shvnvp lúnbø we kvtwa shvlawe jór nònggwòn rì svng vtoshì lúnwe mvtaq vsv̀ngrì kaq gø mòngzø̀l we tvrà kèní vzø̀m vzvp lúnwe íe.